Abdixhiku për tragjedinë në Malishevë: Lutemi që familja të gjejë forcën të përballojë humbjen e pazëvendësueshme

Kryetari i LDK-së, Lumir Abdixhiku, ka shprehur ngushëllime për rastin e babait dhe dy fëmijëve që humbën jetën në Malishevë pas shpërthimit të bombolës së gazit. “Jam thellësisht i prekur nga tragjedia e rëndë që ka goditur një familje në Malishevë, ku humbën jetën babai me dy fëmijë. Kjo tragjedi e madhe na rëndon të gjithëve; si individë, prindër e bashkëqytetarë të Republikës”, ka shkruar Abdixhiku në Facebook. “Në këto momente të rënda, çdo fjalë duket e vogël. Megjithatë, ju shpreh ngushëllimet më të sinqerta familjarëve dhe të gjithë të afërmve. Në emër të Lidhjes Demokratike të Kosovës, ndajmë këtë dhimbje me gjithë zemër dhe qëndrojmë pranë tyre në këto çaste zie, me një solidaritet njerëzor që shkon përtej fjalëve”. Abdixhiku u lut që familja e tyre të gjejë forcën e përballimit të kësaj humbjeje të madhe. “Lutemi që, mes kësaj errësire të madhe, të gjejnë forcë për ta përballuar këtë humbje të pazëvendësueshme”.