Abdixhiku pret në takim Palatovën, theksohet nevoja urgjente për stabilitet institucional

Kryetari i Lidhjes Demokratike të Kosovës, Lumir Abdixhiku, ka pritur në takim shefen në detyrë të Bashkimit Evropian në Kosovë, Eva Palatova. Sipas njoftimit të LDK-së, gjatë takimit u diskutua për zhvillimet e fundit politike në vend, me theks të veçantë në proceset negociuese dhe situatën aktuale institucional, transmeton Klankosova.tv. Abdixhiku theksoi se, përkundër angazhimit maksimal dhe qëndrimeve të qarta të LDK-së në mbrojtje të parimeve demokratike, këto procese nuk kanë prodhuar rezultat. “Në këtë kontekst kryetari Abdixhiku nënvizoi nevojën urgjente për stabilitet institucional, përgjegjësi politike dhe ndërtimin e një alternative të qëndrueshme, që i përgjigjet pritjeve të qytetarëve për zhvillim dhe mirëqenie. Kryetari Abdixhiku shprehu mirënjohje për mbështetjen e vazhdueshme që Bashkimi Evropian i ka dhënë Kosovës, duke vlerësuar rolin e BE-së si të rëndësishëm në forcimin e demokracisë, sundimit të ligjit dhe avancimin e agjendës evropiane të vendit”, thuhet në njoftim.