Afganistani në krizë urie, spitalet mbushen me fëmijë

Afganistani po përballet me një krizë të paprecedentë urie. Në spitalin provincial në Badakhshan, në veri-lindje të vendit, dhomat janë të mbushura me fëmijë të dobësuar rëndë, shumë prej tyre ndajnë dy shtrate dhe varen nga oksigjeni për të marrë frymë, transmeton klankosova.tv. Sipas OKB-së, mbi 4.7 milionë gra dhe fëmijë kanë nevojë urgjente për trajtim nga kequshqyerja, ndërsa 90% e fëmijëve nën pesë vjeç jetojnë në varfëri ushqimore. Në tre muajt e fundit, në këtë spital ka vdekur një foshnje çdo tre ditë, me 53 raste vetëm këtë vit, një rritje prej 50% krahasuar me vitin e kaluar. Fëmijët si Faisal, 12 muajsh, vuajnë nga kequshqyerja dhe komplikacione të tjera serioze, ndërsa nënat e tyre janë të lodhura dhe të dëshpëruara. Shumë prej tyre kanë humbur tashmë fëmijët e tyre për shkak të urisë. Situata është dramatike edhe për Asmën 13 muajshe, që peshon më pak se gjysmën e asaj që duhet. Doktorët po bëjnë gjithçka për ta mbajtur gjallë, por frika mbetet. Spitali është i mbingarkuar, me 20 foshnje për vetëm 12 shtretër. Shumë familje kanë udhëtuar orë të tëra për të kërkuar ndihmë, ndërsa mungesa e stafit, barnave dhe pajisjeve është e madhe. Shumë nga këto probleme lidhen me uljen e ndihmave ndërkombëtare dhe kufizimet e vendosura nga talebanët ndaj grave, që pengojnë punën e tyre dhe përkeqësojnë gjendjen. Përfaqësues të UNICEF-it paralajmërojnë se me rënien e fondeve, vdekjet e fëmijëve të shkaktuara nga kequshqyerja do të rriten ndjeshëm. Në fshatrat e largëta, punonjësit shëndetësorë shkojnë shtëpi më shtëpi për të ndihmuar familjet, por sfidat mbeten të mëdha. Prindërit, si Nasrullah dhe Jamilah, jetojnë në dhimbje për fëmijën e tyre të ndjerë nga kequshqyerja, ndërsa frika për fatin e fëmijëve të mbetur është gjithnjë prezente.