Aksident tragjik në Dhërmi, humb jetën një 9-vjeçar

Një 9-vjeçar ka humbur jetën si pasojë e një vetaksidenti me automjet në rrugën Palasë-Dhërmi, Shqipëri. Sipas njoftimit të Policisë së Shtetit, i lënduar ka mbetur edhe një 20-vjeçar, transmeton Klankosova.tv. Policia po ashtu bëri të ditur se vozitësi dyshohet se ka vozitur në gjendje të dehur, dhe makina i ka dalë nga kontrolli duke u përplasur kështu për anësore të rrugës. “Specialistët e Seksionit të Trafikut Urban dhe Interurban në DVP Vlorë arrestuan në flagrancë, për veprën penale “Drejtimi i automjeteve në mënyrë të parregullt”, shtetasin M. K., 36 vjeç, banues në Librazhd, pasi më datë 24.07.2025, rreth orës 23:10, në aksin rrugor Palasë–Dhërmi, duke drejtuar automjetin në gjendje të dehur, dyshohet se ka humbur kontrollin mbi drejtimin e mjetit dhe është përplasur me bordurën anësore të rrugës. Si pasojë e aksidentit, ka humbur jetën në vendngjarje njëri prej pasagjerëve, një i mitur 9 vjeç. Gjithashtu, është dëmtuar pasagjeri tjetër, shtetasi E. A., 20 vjeç, i cili ndodhet në Spitalin e Traumës, nën kujdesin e mjekëve”, thuhet në njoftimin e policisë.