Aksion policor kundër bixhozit të paligjshëm në 50 lokacione - 34 të arrestuar

Në një operacion të gjerë të zhvilluar në disa rajone të Kosovës, Prokuroria Themelore në Mitrovicë, ka njoftuar se në bashkëpunim me Policinë e Kosovës ka goditur veprimtari të dyshuara për bixhoz të paligjshëm dhe skema piramidale. Aksioni, siç u tha, është shtrirë në Mitrovicë, Vushtrri, Istog dhe Skenderaj, ku janë kontrolluar rreth 50 lokacione, përfshirë lokale dhe shtëpi private, raporton Klankosova.tv. "Janë sekuestruar prova materiale që ndërlidhen me veprat penale, përfshirë: rreth 170,000 euro para të gatshme, pesë (5) automjete, armë zjarri, si dhe pajisje dhe materiale të tjera të përdorura për zhvillimin e aktiviteteve të kundërligjshme. Me vendim të prokurorit kompetent: 29 të dyshuar janë dërguar në mbajtje, ndërsa të dyshuarit tjerë janë liruar në procedurë të rregullt", thuhet në komunikatën për media. Siç ka njoftuar PTHM, veprimet policore në këtë fushëveprim, gjithashtu janë ndërmarrë edhe nga hetimet rajonale dhe stacionet kompetente policore, ku ka pasur rezultate konkrete në parandalim dhe po ashtu arrestim të personave të dyshuar për përfshirje në vepra të ndryshme penale. Po ashtu në totalin e bastisjeve/kontrolleve dhe arrestimeve janë përfshirë edhe veprimet e ndërmarra policore në Skenderaj, ku janë kontrolluar 15 lokacione të ndryshme, 8 persona janë arrestuar dhe nga ta 4 janë derguar në mbajtje. "Këto operacione përfaqësojnë një angazhim të fuqishëm dhe të koordinuar institucional në parandalimin dhe luftimin e krimeve të rënda, krimit ekonomik dhe organizimit të aktiviteteve të paligjshme që cenojnë rendin juridik dhe sigurinë publike.Prokurori i shtetit dhe Policia e Kosovës vlerësojnë lart profesionalizmin, përkushtimin dhe efikasitetin e zyrtarëve policorë dhe hetuesve të përfshirë në këto operacione komplekse, të cilat janë zhvilluar në disa faza dhe lokacione të ndryshme", thotë Prokuroria e Mitrovicës. /Klankosova.tv https://klankosova.tv/aksion-policor-ne-mitrovice-dhe-vushtrri-26-te-arrestuar-e-mijera-euro-te-sekuestruara/