Aktakuzë ndaj pronarit të “Prishtina Jet” dhe tre të tjerëve, akuzohen se mashtruan mërgimtarët me bileta avioni (VIDEO)

Prokuroria Themelore në Prishtinë ka ngritur aktakuzë ndaj pronarit të kompanisë “Prishtina Jet”, Mentor Kazazit, menaxherit të agjencisë, Arbër Blakçorit, Nestret Hoxha dhe Stefanie Zabel. Kazazi dhe Blakçori u arrestuan më 4 gusht të vitit 2022 nga Policia e Kosovës, pas raportimit të KIKS-it se ata mashtruan rreth 300 mërgimtarë me bileta avioni për fluturimet që nuk u realizuan kurrë. Mërgimtarët kishin qëndruan me ditë të tëra në aeroportet e Zvicrës dhe të Gjermanisë, për të kuptuar se biletat e blera nga “Prishtina Jet” kishin qenë fiktive. Sipas aktakuzës, Kazazi, Blakçori, Nestreti dhe Stefanie nisën këto mashtrime nga viti 2020, pre e të cilave ranë 242 bashkatdhetarë. “Përmes reklamimit në websajtin e tyre dhe sms-ave u kanë dërguar të dëmtuarve oferta joshëse për blerje të biletave fiktive me një çmim më të lirë se sa çmimi real, të cilat fluturime nuk janë realizuar asnjëherë ngase nuk kanë qenë të planifikuara e as të rezervuara apo të konfirmuara në sistemin e fluturimeve në Aeroportin e Prishtinës, e as të atyre të Gjermanisë dhe të Zvicrës”, thuhet në njoftimin e Prokurorisë. Përmes kësaj veprimtarie, ata po akuzohen se kanë përfituar qindra mijëra euro, të cilat janë transferuar në xhirollogaritë bankare të agjencisë “Prishtina Jet”, në Prishtinë dhe në llogaritë e tjera të Mentor Kazazit dhe Nestret Hoxhës. “Me këtë të dëmtuarve, u kanë shkaktuar dëm material në shumën prej 165,246.00 €, si dhe 56,981.00 CHF”, njofton Prokuroria. Përveç mashtrimit, Kazazi akuzohet se nuk ka paguar tatim nga viti 2020, për çka akuzohet se e ka dëmtuar buxhetin e Kosovës për 24 mijë e 928 euro e 38 centë. Prokurori i rastit i ka propozuar Gjykatës Themelore në Prishtinë që t’i shpallë fajtorë ata dhe t’ua konfiskojë 165 mijë e 240 euro, 91 mijë e 981 mijë franga dhe një veturë të tipit “Shkoda”, e vitit 2017, pasuri që dyshohet se është fituar përmes këtyre veprave. /Klankosova.tv https://youtu.be/_Zr5zdLg3_0