Ariu i uritur hyn në dyqan, frikëson punëtoren (VIDEO)

Një punonjës i dyqanit 7-Eleven në Kaliforni xhiroi momentin kur një ari kurioz shtyu derën e dyqanit dhe hyri brenda. Rachelle Ducusin tha se kur e vuri re ariun që kërkonte nëpër plehra të dyqanit, hyri brenda për të telefonuar autoritetet. Pas kësaj ariu ndoqi shembullin e saj dhe shtyu derën e dyqanit. Videoja në fjalë tregon punonjësen duke i bërtitur ariut që të largohet ndërsa ai qëndron në hyrje të derës dhe përdor hundën për të ndezur një shpërndarës automatik dezinfektues duarsh. Ducusin shtoi se reaguesit e urgjencës mbërritën në vendngjarje dhe përdorën plumba gome për të trembur ariun. Megjithatë, ajo tha se kafsha u kthye disa orë më vonë për të gërmuar përsëri nëpër plehra. Kevin Thomas, menaxher rajonal për Departamentin e Peshkut dhe Kafshëve të Egra në Kaliforni, deklaroi se etiketa e veshit të ariut tregon se më parë ishte kapur dhe shënuar si pjesë e programit të etiketimit të departamentit në Pellgun Tahoe. "Sjellja nuk është tipike për arinjtë e egër", tha Thomas për SFGate, transmeton Klan Kosova. "Është një sjellje e mësuar nga ndjekja e burimeve të ushqimit njerëzor në vend të kërkimit të ushqimit në natyrë. Liqeni Tahoe ka një popullatë të fortë ariu dhe ata shpesh ndërveprojnë me shtëpitë dhe bizneset në kërkim të ushqimit". https://www.youtube.com/watch?v=hR8ZahIcs_s&t=3s