Arratisja e Altin Ndocit, Softa: Forcat policore do duhej të ishin përforcuar (VIDEO)

Altin Ndoci, një i burgosur me rrezikshmëri të lartë në Shqipëri është arratisur nga reparti Infektiv në Spitalin e Durrësit, ku ishte dërguar për trajtim mjekësor ditën e 13 janarit. Fillimisht, Ndoci ishte përleshur me zyrtarët policorë që e shoqëronin, njërin prej të cilëve e ka goditur me grusht, dhe më pas ka përfituar nga momenti dhe është larguar me shpejtësi nga spitali, transmeton Klankosova.tv. Eksperti i kriminalistikës, Fatjon Softa, në Klan Kosova, tha se i dënuari i akuzuar për vrasje, cilësohet person me rrezikshmëri të lartë, dhe sipas tij, shkalla e sigurisë së tij gjatë shoqërimit në spital do duhej të ishte më e përforcuar. “Së pari, kemi të bëjmë me një person me shkallë të lartë rrezikshmërie, një person i cili është akuzuar për vrasje, i përfshirë më parë në trafikim të lëndëve narkotike. Ky është elementi i parë ku tregon që shkalla e sigurisë së tij, dhe shoqërimi i tij do të duhej të ishte i përforcuar”, tha Softa në emisionin “Kosova Today”. Lidhur me rastin, tetë zyrtarë të Burgut të Durrësit janë arrestuar, të cilët dyshohet se janë të implikuar në arratisjen e Ndocit, derisa është shkarkuar edhe drejtori i burgut, Indrit Cerolaj. https://www.youtube.com/watch?v=xeYCVzwXqYA