Lajmet e fundit
Një zyrtar tjetër i Qendrës së Paraburgimit në Mitrovicë (oficer korrektues) është arrestuar dhe pezulluar nga puna në lidhje me arratisjen e të burgosurit serb, Gjorgje Radimiroviq, më 7 gusht të këtij viti.
Radimiroviq, i cili është në kërkim nga Policia e Kosovës, është dënuar me 14 vite e 6 muaj burgim për veprat penale “vrasje”, “falsifikim dokumentesh” dhe “përdorim narkotikësh”.
Pas arratisjes së tij, Shërbimi Korrektues i Kosovës ka pezulluar menjëherë edhe katër zyrtarë të tjerë të Qendrës së Paraburgimit, përfshirë drejtuesit kryesorë. Në mesin e personave të pezulluar janë drejtori i burgut, një mbikëqyrës i lartë dhe dy zyrtarë korrektues.
Pezullimin e këtyre zyrtarëve e ka konfirmuar edhe ministrja në detyrë e Drejtësisë, Albulena Haxhu, e cila bëri të ditur se janë pezulluar gjithsej drejtori i Qendrës, një mbikëqyrës i lartë dhe katër zyrtarë korrektues.
Hetimet për rastin vazhdojnë, ndërsa Policia e Kosovës është në kërkim të të arratisurit. /Klankosova.tv
https://klankosova.tv/ikja-e-te-burgosurit-shkk-pezullon-drejtorin-e-burgut-ne-mitrovice-dhe-tre-zyrtare-tjere12/
