Australia nënshkruan traktatin e parë me popullin aborigjen

Traktati i parë midis popujve indigjenë dhe një qeverie në Australi ka hyrë në ligj në shtetin e Viktorias, pasi u finalizua dhe u nënshkrua. Anëtarët e Asamblesë së Parë të Popujve të shtetit u mblodhën për një ceremoni për të nënshkruar dokumentin të mërkurën në mbrëmje, përpara se Guvernatorja e shtetit Margaret Gardner të shtonte nënshkrimin e saj në traktat të enjten në mëngjes, raporton “AlJazeera”. Jill Gallagher, një grua nga Gunditjmara dhe ish-komisionere e Komisionit të Avancimit të Traktatit të Viktorias, i tha transmetuesit publik australian ABC se traktati përfaqëson “historinë e rezistencës së popullit aborigjen”. “Ndihem shumë e lumtur. Jam shumë e lumtur”, tha Gallagher, transmeton klankosova.tv. “Sot shënon një pikë kthese në historinë e kombit tonë, një moment ku plagët e vjetra mund të fillojnë të shërohen dhe marrëdhëniet e reja mund të ndërtohen mbi të vërtetën, drejtësinë dhe respektin e ndërsjellë”, tha ajo. Kryeministrja e Viktorias, Jacinta Allan, e përshkroi nënshkrimin e traktatit si një “kapitull të ri” në historinë e shtetit. “Është një kapitull që bazohet në të vërtetën, udhëhiqet nga respekti dhe çohet përpara përmes partneritetit... një partneritet për të ndërtuar një Viktori më të fortë, më të drejtë dhe më të barabartë për të gjithë”, tha Allan. Traktati, i cili është përshkruar si historik nga shefi i të drejtave të njeriut të Kombeve të Bashkuara, Volker Turk, formalizon krijimin e Asamblesë së Përhershme të Popujve të Parë të Viktorias. Australia u kolonizua nga Perandoria Britanike e atëhershme në vitin 1788, me kolonët që mbërritën për herë të parë në atë që njihet tani si Viktoria në fillim të viteve 1800. Ndërsa fuqitë britanike hynë në traktate me popujt indigjenë në vendet e tjera të kolonizuara, duke përfshirë Kanadanë, Zelandën e Re dhe Shtetet e Bashkuara, asnjë traktat nuk u nënshkrua kurrë në Australi. /Klankosova.tv