Bajrami për Kurtin: Po kërkon sundim, jo qeverisje

Deputetja e LDK-së, Hykmete Bajrami ka kritikuar qasjen e Lëvizjes Vetëvendosje në krizat e fundit politike dhe institucionale në vend. Bajrami përmes një postimi në Facebook ka thënë se LVV kishte mbajtur rreth 60 seanca në Kuvend për të arritur qëllimin e zgjedhjes së Albulena Haxhiut si kryeparlamentare, raporton KlanKosova.tv. Tutje, ajo deklaron se pas këtij qëndrimi LVV tash e do presidentin me 'çdo kusht' duke 'sakrifikuar' pozitën e kryeparlamentarit në Kuvend. "Në vitin 2025 janë mbajtë rreth 60 seanca për ta bërë Albulenën kryetare të Kuvendit dhe asnjë seancë për të bërë ndonjë zgjidhje për qytetarët e vendit.Kur ata nuk arritën ta bëjnë kryetaren e Kuvendit, e çuan vendin në zgjedhje.Sot, thonë: “kryetarin e Kuvendit e japim” por presidentin e dojmë me çdo kusht", ka shkruar Bajrami. Postimi i plotë: Në vitin 2025 janë mbajtë rreth 60 seanca për ta bërë Albulenën kryetare të Kuvendit dhe asnjë seancë për të bërë ndonjë zgjidhje për qytetarët e vendit. Kur ata nuk arritën ta bëjnë kryetaren e Kuvendit, e çuan vendin në zgjedhje. Sot, thonë: “kryetarin e Kuvendit e japim” por presidentin e dojmë me çdo kusht. Dhe për këtë, Kurti prapë po e çon vendin në zgjedhje, madje po paralajmëron edhe zgjedhje të tjera pas atyre që do të mbahën në qershor. Në ndërkohë: Çmimet rriten çdo ditë. Rinia po ikë. Albini i ka 51%. Me minoritetet - 66 deputetë. E ka qeverinë krejt vetë, me 19 ministri e 4 miliardë euro buxhet në dispozicion. Por të gjitha këto nuk po i mjaftojnë. Kërkon pushtet më shumë se përgjegjësi. Ai po kërkon me sundu jo me qeverisë. Dhe meqë është derivat i krizave nuk i rrihet pa krizë, por ta dini se kostot e sjelljeve të tij janë dëme të pariparushme jo vetëm për qytetarët, por edhe për shtetin e Kosovës. Kosova e ka armikun e jashtëm, e dimë të gjithë cili është, por jostabiliteti politik është armiku më i madh brenda vendit.