Bangladeshi në tension pas vrasjes së një aktivisti të kryengritjes së vitit 2024

Bangladeshi është përfshirë nga tensione të forta pasi vrasja e një aktivisti të njohur të kryengritjes së vitit 2024 ka nxitur protesta të dhunshme në kryeqytetin Dhaka dhe qytete të tjera, vetëm disa muaj para zgjedhjeve kombëtare të planifikuara për në shkurt. Forcat e sigurisë janë vendosur në gatishmëri të lartë dhe kanë shtuar patrullimet në të gjithë vendin, pasi protestat e së enjtes mbrëma u përshkallëzuan në dhunë, duke pasur në shënjestër zyra mediash, ndërtesa politike dhe institucione kulturore. Të premten në mëngjes situata ishte relativisht e qetë, por banorët raportuan se tensionet mbetën të larta, veçanërisht para faljeve të së premtes. Shkak i trazirave ishte vdekja e Sharif Osman Hadi, 32 vjeç, zëdhënës i platformës opozitare Inquilab Mancha dhe kandidat i shpallur për zgjedhjet e ardhshme. Ai u qëllua në kokë nga persona të maskuar javën e kaluar në Dhaka, gjatë nisjes së fushatës së tij elektorale. Pas disa ditësh në gjendje kritike dhe trajtimit mjekësor në Singapor, Hadi ndërroi jetë. Hadi ishte një figurë kyçe e kryengritjes studentore të vitit 2024, e cila çoi në rrëzimin e ish-kryeministres Sheikh Hasina. Ai njihej gjithashtu për qëndrimet e tij kritike ndaj Indisë. Qeveria e përkohshme, e drejtuar nga laureati i Çmimit Nobel për Paqen, Muhammad Yunus, e cilësoi vdekjen e Hadit si “një humbje të pazëvendësueshme për jetën politike dhe demokratike të vendit”. Ai u bëri thirrje qytetarëve për qetësi dhe premtoi një hetim transparent, duke paralajmëruar se dhuna mund të dëmtojë besueshmërinë e procesit zgjedhor. Autoritetet shpallën të shtunën ditë zie kombëtare, me flamuj në gjysmështizë dhe lutje të posaçme në të gjithë vendin.