Besim Hasani: Kosova përgëzohej nga të gjithë në "Baku 2015"

12 qershori shënoi fillimin e Lojërave Europiane “Baku 2015” në Azerbajxhan. Ato u organizuan për herë të parë, ndërsa pjesëmarrëse ishte edhe Republika e Kosovës, me 19 garues në disiplina të ndryshme. I kontaktuar nga Klan Kosova, Kryetari i Komitetit Olimpik të Kosovës, Besim Hasani, nga Stambolli është shprehur shumë i kënaqur me prezantimin në këto lojëra dhe arritjet e garuesve kosovarë. “Është arritje shumë e madhe që si shtet kemi marrë pjesë në një nivel të tillë të garave". "Përveç kësaj, të fitosh edhe medalje është e papërshkrueshme". "Kënaqësinë më të madhe na e dha xhudistja Nora Gjakova, e cila fitoi medaljen e bronztë”. Hasani ka folur edhe për mikpritjen, duke thënë se ka qenë e shkëlqyer. “Gjithçka ka qenë në rregull". "Jemi pritur në mënyrën më të mirë të mundshme, ndiheshim mirë pasi po merrnim pjesë për herë të parë në një garë të tillë". "Të gjithë na afroheshin dhe na përgëzonin për punën e arritur”. Hasani e ka theksuar faktin se garuesit nga Kosova kanë potenciale edhe më të mëdha nga ato që treguan atje, pasi me pak fat mund të rrëmbenin edhe medalje të tjera, si në boks, karate dhe xhudo. "Kudo që shihej flamuri i Kosovës njerëzit afroheshin dhe na përshëndetnin". "Mendoj se në këtë formë ne kemi arritur ta bëjmë atë të cilën kemi dashur, pra prezantimin e Kosovës në arenën ndërkombëtare". Hasani ka thënë se ndjehet mjaft mirë me arritjet që kanë bërë si Komitet Olimpik. Sipas tij, me këtë nivel që janë duke ecur, në Lojërat Olimpike Rio 2016 kanë për të bërë edhe më shumë. Lojërat Europiane “Baku 2015” kanë përfunduar dje, ndërsa Përfaqësuesja e Kosovës sonte do të kthehet në Kosovë.