Biznesi 40-vjeçar i familjes Mehmeti rrezikohet nga zgjerimi i rrugës në Ferizaj (VIDEO)

Familja Mehmeti, pronare e kompanisë “Elektrosistem” që merret me shitblerjen e materialeve elektrike, është përballur me probleme për shkak të projektit për zgjerimin e rrethrrotullimit në segmentin e Rrugës Nacionale N2, në hyrje të Ferizajt. Nga 25 ari tokë që ata kanë trashëguar, rreth 4 ari pritet t’i kalojnë shtetit për zgjerimin e rrugës. Zgjerimi i zonës së gjelbër nga 13 në 32 metra, e ka bërë të vështirë parkimin e kamionëve dhe hyrjen e automjeteve në këtë biznes, raporton Kiks Kosova. Projektet e zgjerimit të rrethrrotullimit kanë nisur në vitin 2018. Familja Mehmeti pretendon se nuk iu dorëzua vendimi preliminar për shpronësim në kohë, duke humbur mundësinë për t’u ankuar. Tri gjykata të Kosovës shpallën veten jo kompetente për të shqyrtuar rastin, duke e kthyer çështjen mes institucioneve. Aktualisht, parcela vazhdon të figurojë në emër të familjes Mehmeti në Kadastër, pavarësisht që Ministria e Infrastrukturës e konsideron të shpronësuar. Ekspertët e komunikacionit kanë analizuar projektin dhe kanë propozuar se dimensionet aktuale të rrethit janë të tejzmadhuara dhe se vendosja e semaforëve mund të ndihmojë në lehtësimin e trafikut dhe uljen e kostove të shpronësimit. Sipas ekspertëve, punimet nuk duhet të nisin pa përfunduar procesi i shpronësimit. Projekti për zgjerimin e hyrjes në Ferizaj, i financuar nga Banka Evropiane për Rindërtim dhe Zhvillim, ka filluar në vitin 2018. Kontrata për përmirësimin e rrugës hyrëse të Ferizajt iu dha kompanisë “Salillari” sh.p.k  nga Shqipëria më 22 nëntor 2024, me një vlerë prej 16.3 milionëshe të BERZH-it, e të cilët premtuan se ky projekt do të përfundojë më 16 dhjetor 2026. Kiks Kosova ka kërkuar nga Ministria e Infrastrukturës sqarime mbi bazën ligjore të fillimit të punimeve, njoftimin e bizneseve të prekura, dhe planet për pezullimin e punimeve deri në vendimet gjyqësore përfundimtare. Në një përgjigje me shkrim për Kiks-Kosova, nga ky dikaster kanë thënë se nuk kanë asnjë informacion për një kontestim të tillë për parcelën në fjalë. Sipas tyre, ky projekt ka bazë të plotë ligjore dhe mbështetet në vendime përfundimtare për shpronësim. Ndiqni kronikat në vijim të realizuara nga Kiks Kosova për rastin në fjalë: https://youtu.be/-GQ35CQQauw https://youtu.be/3k2rUizOU8Q https://youtu.be/BeeHh9VyIq8 https://youtu.be/gkZR98GV83Q