Borxhi ndaj mjekëve dhe infermierëve rritet, dy muaj pa pagesa për kujdestari në QKUK

Mjekët dhe infermierët e QKUK-së nuk janë paguar për kujdestaritë e mbajtura gjatë muajit mars, njësoj siç kishte ndodhur edhe në shkurt. Për këtë ka raportuar gazetarja e Klan Kosovës, Arbreshë Uka, e cila e kishte ngritur të njëjtën çështje edhe muajin e kaluar. Lidhur me situatën ka reaguar edhe Sindikata e Punëtorëve Shëndetësorë të QKUK-së, e cila e ka cilësuar mospagesën e kujdestarive si të papranueshme dhe si neglizhencë institucionale. Në reagimin publik, sindikata thekson se kujdestaritë janë një obligim i rregullt dhe i planifikuar në sistemin shëndetësor, dhe jo një shpenzim i paparashikuar. “Mosrealizimi i pagesave në kohë dëshmon për një neglizhencë të qartë institucionale, në përpunimin e listave, në aprovimet administrative apo në transferin e mjeteve financiare. Ky dështim nuk mund të arsyetohet ndryshe përveçse me mungesë efikasiteti dhe përgjegjësie nga strukturat përkatëse”. Kështu, shteti u mbetet borxh mjekëve dhe infermierëve për pagesën e kujdestarive për dy muaj./Klankosova.tv https://klankosova.tv/sindikalistet-e-qkuk-se-kerkojne-urgjentisht-pagesat-e-kujdestarive-kjo-eshte-e-papranueshme/