“Buton paniku” në celular për të parandaluar dhunën ndaj grave

India ka bërë një përpjekje për të parandaluar krimet kundër grave, duke hedhur  disa hapa konkretë  dhe duke bashkëpunuar me teknologjinë, transmeton Klan Kosova. Duke nisur nga janari i vitit 2017, çdo telefon në Indi do të jetë i pajisur me një buton paniku. Ky vendim është marrë nga qeveria për t’iu ardhur në ndihmë femrave të cilat ndjehen të rrezikuara. “Teknologjia ka për qëllim të përmirësojë jetën e njerëzve dhe ku ka më mirë që përdorimi i saj të jetë në funksion të sigurisë së femrave”, thuhet në komunikatën për mediat e qeverisë indiane. Sipas këtij plani, në momentin që përdoruesi do të shtypë butonin 5 ose 9, shkon menjëherë një telefonatë emergjence. India është një ndër vendet me numrin më të madh në botë të dhunës ndaj femrave dhe përdhunimeve. Vetëm në 2014-ën, në këtë shtet u raportuan 337.922 krime kundër femrave, përfshirë mbi 36 mijë përdhunime.