Çeku në hapjen e Muzeut të Burgut të Prishtinës: Lirinë e shtetit ua kemi borxh të burgosurve politikë

Në ambientet e ish-ndërtesës së Qendrës së Paraburgimit në Prishtinë, është hapur Muzeu i Burgut të Prishtinës, si dhe ekspozita e përkohshme “Burgu i Idealit”. Në këtë ceremoni kanë marrë pjesë edhe ministri i Kulturës, Hajrullah Çeku, si dhe ministrja e Drejtësisë, Albulena Haxhiu. Më këtë rast, ministri i Kulturës, Hajrullah Çeku, tha se ekspozita do të jetë e hapur për të gjithë ata që duan ta kuptojnë historinë e rezistencës politike. “Nga një qendër paraburgimi po e shndërrojmë në qendër dokumentimi të kujtesës sonë kolektive të rezistencës të aktivistëve. “’Burgu i Idealit’ hap dyert dhe nuk do të mbyllen më. Do të jenë të hapura për gjithë, për të kuptuar historinë e rezistencës politike. Në këtë qendër hyhej pa e ditur se a do të dilje jashtë apo a do të dilje gjallë”. Tutje, Çeku vlerësoi sakrificën e të burgosurve politikë, të cilës ia la edhe meritat për lirinë e shtetit. “Sot i përkulemi sakrificës së mijërave të burgosurve politikë, që kanë vuajtur nëpër burgjet në Kosovë e Serbi e i shprehim mirënjohjen tonë për kontributin e rezistencën”. “Këtë histori duhet t’ua tregojmë fëmijëve të gjithë qytetarëve që sakrifica e rezistenca e ish të burgosurve politikë të mos harrohet kurrë. Këtë duhet t’ia themi gjithë botës”. “Për lirinë e shtetit qe e gëzojmë, këtë angazhim ua kemi borxh të gjithë të burgosurve politikë shqiptarë”, u shpreh ai. Ndërsa në emër të Shoqatës së të Burgosurve, Hydajet Hyseni, tha se ky muze mund t’i shërbejë Prishtinës si një objekt reflektues e përkujtues. “Uroj që duke kthyer burgun në një muze te ri, edhe Prishtina jonë ta ketë një objekt reflektues e memorial përkujtues. Falim por nuk harrojmë! Miniekspozita është vetëm një pjesë shumë e vogël simbolike. Të flasësh për burgun muze do të thotë të flasësh për të burgosurit tanë… ish të burgosurit, ku bëj pjesë edhe unë”. “Imazhi dhe pamja e jashtme ishte e rrejshme dhe mashtruese, njeriu është dënuar të jetë i lirë dhe të zgjedhë… Por për njeriun rob e me shpirt lirie esenca ishte paqësore në raport me ekzistencën” Fare është folur për anën tjetër të medaljes, për dimensionin e lirisë në pranga. Pamja e këtyre qelive ka qenë ndryshe”, deklaroi ai para të pranishmëve. Tutje, Hyseni foli për ashpërsinë e burgut dhe uroi që të mos ketë më të burgosur politikë. Muzeu do të jetë i hapur çdo ditë prej orës 10:00 deri 19:00, përveç ditës së hënë./EO