Çelaj: Pjesë e punës sime do të jetë edhe rrënimi

Kandidati i PDK-së për Prishtinën, Lirak Çelaj ka treguar se çfarë përfshin programi i tij për ndërtimet në kryeqytet, nëse ai e merr “timonin” e kryeqytetit. “Do të këmbëngul që të ndahet procesi i konkursit të projektit me investitorin sepse tek ne ndodh që investitori ta imponon dukjen e objektit. Dukja e një objekti është pronë publike, nuk mund të vendos vetëm investitori”. “Jemi mbushur me banesa pa shije, me ngjyra e ballkona palidhje që e kanë shëmtuar qytetin”. Çelaj në “Zona e Prishtinës” në Klan Kosova ka thënë se nëse ai do të jetë i pari i Prishtinës, objektet që do të ndërtohen nuk mund të marrin leje pa marrë aprovimin e një Këshilli të Arkitektëve. “Do të jetë një trup këshillë-dhënës, arkitektët janë ata që vendosin për dukjen”. Ai ka thënë poashtu se “Prishtina është një qytet pa identitet”. “Nuk e di ku e kemi një objekt ose monument që kur fotografohesh është pjesë e identitetit të qytetit. Do të insistoj që të ketë sa më shumë të tilla”. Por Çelaj ka thënë se pjesë e punës së tij do të jetë edhe rrënimi i objekteve që tashmë janë ndërtuar. “Në pjesë të punës sime do të jetë edhe rrënimi edhepse kjo mund të tingëllojë jo mirë për vota. Nëse nuk rrënojmë disa objekte për të krijuar hapësirë, ne nuk do të arrijmë të funskionalizojmë qytetin tonë”. “Të gjitha do të kompensohen dhe askush nuk do të jetë i dëmtuar”. “Unë e di që është edhe kosto edhe ekonomi por Prishtina i ka 2 milion euro për shpronësim dhe ato nuk përdoren, ka edhe forma të tjera, si p.sh bonoja e ndërtimit, e vlerëson një obejtk dhe e kompenson në një vend tjetër”. “Qytetit duhet t’i krijohet hapësira për të marrë frymë, deri tash asnjëherë nuk ka ndodhur rrënimi i objekteve pa leje”.