Celibashi (KQZ): Cenimi i votës së çdo kandidati në listën 'e hapur' përbën një shkelje të integriteti zgjedhor

Kryetari i Komisionit të Zgjedhjeve të Shqipërisë, llirjan Celibashi, ka përmendur disa pika që nuk duhet të harrojnë, sipas tij, të gjithë anëtarët e Grupeve të Numërimit të Votave dhe të KZAZ-ve. Në një postim në Facebook, ai ka thënë se cenimi i votës së çdo kandidati në listën “e hapur” përbën një shkelje të rëndë të integriteti zgjedhor e që sjell pasoja ligjore serioze për përgjegjësit. "Në këtë kuadër, rikujtojmë se është e ndaluar të bëhet një rivlerësim i votave për partitë politike apo koalicionet, tani që ka filluar procesi i numërimit dhe i vlerësimit të votave për kandidatët në listën 'e hapur'. Ligji përcakton qartë se, fletët e votimit, në të cilat vota është shprehur vetëm për partinë apo koalicionin, ruhen në një zarf të veçantë dhe nuk i nënshtrohen rivlerësimit gjatë procesit të numërimit dhe të vlerësimit të votave për kandidatët". "Çdo shkelje e këtij rregulli do të konsiderohet si tentativë për të manipuluar rezultatin zgjedhor dhe do të ndiqet me masa të rrepta ligjore. Komisioni Qendror i Zgjedhjeve disponon filmimet e procesit të numërimit dhe vlerësimit të votave për partitë dhe koalicionet për të gjitha KZAZ", ka shkruar Celibashi.