Danina Rexhepi, nëntëvjeçarja që nuk po njeh konkurrencë në karate

Që nga mosha katërvjeçare iu dha sportit të karatesë. E kur i mbushi shtatë vjet nisi të garojë në stilin "KATA". Danina Rexhepi, nuk po njeh konkurrencë në këtë sport për grupmoshat e saj në Kosovë. Sot, ajo e mbrojti epitetin e kampionës së Kosovës, që e mban për tre vjet rresht. Nëntëvjeçarja gjithashtu sukseset i ka të dukshme edhe në garat ndërkombëtare që janë mbajtur në Maqedoninë e Veriut por edhe në Shqipëri. Babai i saj, Jetmir Rexhepi, tha për Klankosova.tv se dashuria për këtë sport ka ardhur nga familja. "Dashurinë për karaten si duket e ka trashëguar. Unë dhe motra kemi qenë kampionë Ballkanik dhe Evropian në karate. Kemi garuar për Shqipërinë, pasi që në atë kohë Kosova e kishte të pamundur të garonte pasi nuk njihej nga komuniteti sportiv ndërkombëtar". Ai thotë se vajza e saj nga mosha 10 vjeçare do të hyjë edhe në luftëra. "Deri në moshën 10 vjeçare sipas rregullave në karate nuk lejohen luftërat me kundërshtarë. Por, nga mosha 10 vjeçare gjithsesi se edhe Danina do të nis një dimension tjetër të garave". Rexhepi thotë se merita të veçanta për suksesin e vajzës së tij i kanë edhe dy trajnerët. "Meritorë po ashtu për suksesin e Daninës, janë edhe dy trajnerët Asdren Myrtaj dhe Naim Ilazi". Sipas prindit, talentja e karatesë gradualisht do të fillojë përgatitjet për të marrë pjesë edhe në garat evropiane dhe botërore.