Dasma me krisma armësh, Policia në Malishevë kryen kontrolle në dy lokacione

Festat me armë janë të shpeshta në Kosovë dhe jo rrallëherë e kanë pësuar qytetarët. Në dy raste të fundit në Malishevë, policia ka njoftuar se ka sekuestruar revole, pas kontrolleve të kryera në dy shtëpi. Policia Rajonale në Gjakovë njoftoi se në lokacionin e parë, më 12 gusht, në fshatin Lladroviç është raportuar për të shtëna me armë zjarri, ku u gjetën rreth 20 gëzhoja. Të dyshuarit janë intervistuar dhe kanë dorëzuar armët ilegale, raporton Klankosova.tv “Pas ndërmarrjes së veprimeve të menjëhershme, njësia e hetimeve e mbështetur nga njësitë tjera relevante të policisë, ka identifikuar lokacionin dhe personat e dyshuar, ku fillimisht janë sekuestruar 17 gëzhoja dhe 20 fishekë. Në koordinim me Prokurorin e Shtetit, është realizuar kontrolli i shtëpive dhe intervistimi i tyre, ku personat e dyshuar kanë pranuar posedimin e armëve dhe kanë dorëzuar një revole dhe një pushkë gjuetie me leje të skaduar.” Ndërsa në lokacionin tjetër, rasti u zbulua nga rrjetet sociale dhe i dyshuari është i moshës së mitur. “Pas postimit të një fotografie në rrjete sociale ku shihej një person mashkull i mitur duke e mbajtur një pistoletë i njëjti është identifikuar dhe është intervistuar në prani të avokatit mbrojtës dhe zyrtarit të qendrës sociale, ku arma e ekspozuar i takonte një familjari mashkull i moshës madhore, i cili gjatë intervistimit deklaroi që është e tij dhe e dorëzoi vullnetarisht në Policinë e Kosovës.”/ Klankosova.tv