Deliu-Kodra shpreh ngushëllime për vdekjen tragjike të kosovarëve në Vjenë

Deputetja e PDK-së, Blerta Deliu-Kodra ka shprehur ngushëllime për katër shqiptarët nga Kosova, që humbën jetën tragjikisht në Vjenë të Austrisë. Përmes një postimi në Facebook, Deliu-Kodra e quajti humbje tragjike shuarjen e katër jetëve, transmeton Klankosova.tv. “Me dhimbje të thellë mora lajmin për humbjen tragjike të katër bashkëqytetarëve tanë në Vjenë. Ngushëllimet më të sinqerta për familjet e tyre në këto momente të rënda”, ka shkruar ajo. Dyshohet se katër viktimat vdiqën në vendin e punës në Vjenë, si pasojë e thyerjeve të skeleve gjatë ditës së martë. Deri më tani, vetëm Pajtim Bajrami nga Klina e Poshtme e Skenderajt është identifikuar si një nga viktimat e kësaj tragjedie.