Dënimi për “marre”: 4.500 euro gjobë Koalicionit për familje (VIDEO)

Fushatën zgjedhore po e zhvillojnë në çdo qytet të Kosovës, por me gjuhën që përdorën në këto tubime nuk u pajtua Paneli Zgjedhor për Ankesa dhe Parashtresa (PZAP), dhe të mërkurën e dënoi Koalicionin për Familjen me gjobë prej 4.500 euro. E për ta kundërshtuar këtë vendim, katërshja e përbërë nga Eman Rrahmani, Ferid Agani, Selim Pacolli e Fatmir Smajli, thirrën konferencë të jashtëzakonshme për media, raporton Klan Kosova. Veç gjobës që morën, Rrahmani pretendoi se i është bërë edhe një tjetër padrejtësi. Megjithatë, këto zhvillime u tha që nuk e ndalojnë dot aktivitetin e tyre. Për të siguruar ulëse në Kuvendin e Republikës së Kosovës, menjëherë pas përfundimit të konferencës u mblodhën për t’ia bërë hyzmetin. Kur morën rrugën drejt Tregut të Gjelbër në Prishtinë, disponimin e patën të mirë, e punën e gjobës u duk që e morën më sportivitet. Bile për fjalën që u dënuan, Selim Pacolli tha që do ta heqin edhe nga fjalori për një kohë të caktuar. Rrugës bënë llaf me njëri-tjetrin, e në vendin ku e patën destinacion, muhabet bënë me tregtarët. Kur morën udhën e kthimit, një nga shitësit i provokoi duke ua lëshuar fjalimin e Albin Kurtit ku thotë “pasha musafin e pasha Kuranin po fitojmë”. Pasi i shkuan në tezgë këtij simpatizanti të Vetëvendosjes, edhe ky u pajtua me kauzën e Listës për Familjen. Bile këta të fundit thanë që e kthyen kah vetja. Kur edhe me këtë u pajtuan, vizitën në treg e përfunduan duke bërë blerje. /Klankosova.tv https://www.youtube.com/watch?v=LEtk0WSShDA&t=9s