Dënimi skandaloz për aksidentin me 4 të lënduar, Apeli gjen shumë shkelje në aktgjykimin e Themelores (VIDEO)

Familja e Yll Sylës, njërit nga të lënduarit rëndë në aksidentin e 25 korrikut të 2022-ës, nuk e pranuan aktgjykimin e Gjykatës Themelore në Prishtinë e cila e dënoi me vetëm 3 mijë euro gjobë Sami Kelanin, të akuzuarin për shkaktimin e këtij aksidenti. Mbrojtja e 20-vjeçarit u ankua në Gjykatën e Apelit, e cila më 28 prill të 2023-ës, mori vendim për anulimin e aktgjykimit të gjykatës së shkallës së parë, duke e kthyer lëndën në rigjykim. Në aktvendimin e Gjykatës së Apelit konstatohet se me rastin e shqiptimit të këtij dënimi, gjykata e shkallës së parë ka bërë një varg shkeljesh. Ky nen përcakton se “Kur i akuzuari dënohet me burgim, arsyetimi përfshin rrethanat të cilat gjykata i ka marrë parasysh me rastin e caktimit të dënimit. Gjykata veçanërisht arsyeton se në cilat shkaqe është bazuar kur ka konstatuar se ka të bëjë veçanërisht me rast të rëndë dhe se duhet shqiptuar dënim më të rëndë se dënimi i paraparë, ose ka konstatuar se është e nevojshme të ulë apo të heqë dënimin, të shqiptojë dënim alternativ ose masën për trajtim të detyruar rehabilitimi ose të konfiskohet dobia pasurore e fituar me vepër penale”. Prandaj, bazuar në këtë dispozitë ligjore, gjykata cilësoi se arsyetimi është i paqartë dhe kontradiktor me rrethanat e çështjes. Sipas nenit 69 të Kodit Penal të Republikës së Kosovës, “Kur cakton dënimin për vepër penale, gjykata duhet të ketë parasysh minimumin dhe maksimumin e dënimit të paraparë për atë vepër penale. Gjykata pastaj duhet të merr parasysh qëllimin e dënimit, parimet e përcaktuara në këtë kapitull dhe rrethanat lehtësuese dhe rënduese lidhur me veprën penale të caktuar ose me dënimin”. Gjykata e dënoi me vetëm 3 mijë euro gjobë Sami Kelanin për “Rrezikim të trafikut publik”, ani pse neni 370 i Kodit Penal parasheh që sanksioni për këtë vepër të jetë deri në pesë vjet burgim. Në rastin konkret, Apeli konstaton se aktgjykimi i Gjykatës Themelore në Prishtinë përbën shkelje për faktin se kjo gjykatë me rastin e caktimit të dënimit, ka shpërfillur rrethanat rënduese të rastit dhe ka mbivlerësuar pranimin e fajësisë. Me aktvendimin e Apelit pajtohet edhe avokati i Yllit, Florim Shefqeti. Sipas tij, përveç faktit se ka pasur shumë shkelje procedurale, të dëmtuarit nuk janë marrë fare në pyetje nga ana e Prokurorisë. Mbrojtja e Yllit ia ka paraqitur gjykatës raportet mjekësore të 20-vjeçarit për trajtimin e vazhdueshëm intensiv dhe ka kërkuar përsëritje të ekspertizës mjeko-ligjore. Ai po ashtu ka kërkuar rikualifikim të veprës penale dhe vlerësim të rrethanave rënduese. Avokati pohon se në këtë rast nuk është paraqitur asnjë provë që dëshmon se të akuzuarit i është bërë testi i alkoolit apo substancave narkotike në ditën kur ka ndodhur aksidenti.    Prandaj, ai kërkon që të bëhet rivlerësimi i shpejtësisë së lëvizjes së automjetit të 55-vjeçarit. Ndonëse Sami Kelani ka deklaruar se në momentin e aksidentit ka qenë duke vozitur me shpejtësi 110 – 120 km/h, mbrojtja e Yllit vlerëson se gjurmët e frenimit lënë të kuptohet se shpejtësia ka qenë më e lartë. Meqë, Kelani ka deklaruar se do të bëjë kompensimin e dëmit, mbrojtja ka kërkuar që në këtë procedurë penale të bëhet edhe gjykimi i kërkesës pasojë juridike. Shefqeti pret drejtësi nga rigjykimi, por para drejtësisë vërtetim të plotë të gjendjes faktike. https://youtu.be/QrvulzcY8pE