Dizajnerja riciklon çamçakëzët, i transformon në gjëra të përdorshme

Me miliarda të holla shpenzohen në çamçakëzë në mbarë botën për çdo vit, por një shumë e tyre përfundojnë në tokë çdo ditë. Ndërsa dizajnerja britanike Anna Bullus, ka nisur një mision për të ricikluar çamçakëzët e hedhur në rrugë, duke i transformuar ato në gjësende të përdorshme, njofton Klan Kosova. Si pjesë e strategjisë së saj, fillimisht Anna krijoi kazane të ndritshme, në formë flluske, të posaçme për hedhjen e çamçakëzit, e më pas ajo instaloi 11 kuti të posaçme për të përforcuar mesazhin se çamçakëzi mund të riciklohet nëse është deponuar me përgjegjësi e po ashtu dha qindra gota kafeje të bëra nga çamçakëzët e ricikluara për studentët e vitit të parë në një universitet britanik. Pas realizimit të procedurave, Anna ka arritur të sjell këpucë me gomë të punuara nga çamçakëzët e ricikluar, një palë çizme nga po i njëjti material si dhe gjëra të tjera të përdorshme, njofton Klan Kosova. Çamçakëzët janë lloji i dytë i mbeturinave të hedhura në rrugë, pas materialeve të cigareve.