Djali i “El Chapos" pranon fajësinë në SHBA për trafik droge dhe krim të organizuar

Joaquin Guzman Lopez, djali i bosit të njohur meksikan të drogës “El Chapo” Guzman, ka pranuar fajësinë në një gjykatë federale në Çikago për dy akuza të trafikut të drogës dhe krimit të organizuar. Ai ndryshoi qëndrimin nga deklarata e mëparshme “i pafajshëm” pas arrestimit të tij vitin e kaluar. I veshur me uniformë portokalli të burgut, Guzman Lopez foli pak gjatë seancës. Kur gjykatësja Sharon Coleman e pyeti se çfarë pune bënte, ai u përgjigj shkurt: “Trafik droge”. Sipas marrëveshjes së nënshkruar me prokurorët, ai pritet të shmangë dënimin me burgim të përjetshëm duke bashkëpunuar me autoritetet amerikane dhe duke paguar 80 milionë dollarë, që përfaqësojnë fitimet nga aktivitetet kriminale. Megjithatë, ai përballet me një minimum prej 10 vitesh burg, ndërsa dënimi i tij do të shpallet në një datë të mëvonshme. Sipas marrëveshjes, ai nuk do të ketë të drejtë apelimi. Avokati i tij, Jeffrey Lichtman, tha se “qeveria ka qenë e drejtë me Joaquin deri tani” dhe falënderoi autoritetet meksikane që nuk ndërhynë. Guzman Lopez, së bashku me vëllain e tij Ovidio, janë dy nga katër djemtë e “El Chapo”-s, të njohur në Meksikë si “Chapitos”. Ata akuzohen se trashëguan dhe drejtuan një pjesë të fuqishme të kartelit Sinaloa.