Donjeta Sadiku synon medaljen e artë në Kampionatin Evropian të boksit

Boksierja kosovare, Donjeta Sadiku, do të garojë në Kampionatin Evropian të boksit, që do të mbahet në Budva të Malit të Zi. Sadiku do të synojë medaljen, pas suksesit në Kampionatin Botëror 2022, ku fitoi medaljen e bronztë, në kategorinë deri në 60 kilogramë, transmeton Klankosova.tv. Ajo, së bashku me selektorin Faton Xhakli dhe trajneren Marjola Sallauka, nesër do të udhëtojnë në Budva të Malit të Zi. Sipas trajneres Marjola Sallauka, Donjeta është në formë të mire dhe e përgatitur maksimalisht për këtë Kampionat Evropian, shpreson dhe beson se nga ky Kampionat Evropian, Donjeta do të kthehet si kampione me medalje të artë. "Duhet cekur se boksierja Sadiku ka qenë kampione Evropiane juniore dhe nënkampione e Evropës për të reja (Youth),dhe këtë vit presim që Donjeta të kurorëzohet me titullin e kampiones së Evropës dhe me medaljen e artë edhe si seniore", thuhet në njoftimin e Federatës së Boksit të Kosovës. Ky kampionat do të mbahet nga data 14 deri më 23 tetor.