Dosja kriminale e Arian Qelajt, të dyshuarit për tentim vrasjen në Pejë: 7 aktakuza, por i 'pastër' në gjykatë

Dosja penale e Arian Qelajt, njërit nga tre të kërkuarit për plagosjen e javës së kaluar në Pejë, po del të jetë goxha e ‘pasur’. Me vepra të ndryshme penale, që dyshohet se i kreu ndër vite, 44-vjeçari tash po dyshohet edhe për ‘vrasje në tentativë’. Por, epilogu i gjithë këtyre rasteve nuk ka shenja në Gjykatën Themelore në Pejë, raporton Klankosova.tv Emri i Arian Qelajt – që sipas informacioneve të para, dyshohet të jetë kryesori i këtij grupi, është figurë e njohur për sistemin e drejtësisë. Rasti i 11 janarit, ku Qelaj dhe dy anëtarë të familjes së tij, tentuan ta vrasin një person në qytetin e Pejës, aktivizoi Policinë e Prokurorinë dhe grupi i dyshuar u shpall në kërkim. Klankosova.tv ka kërkuar nga Prokuroria Themelore në Pejë historinë e Qelajt në këtë institucion dhe hetimet që janë kryer për raste të ndryshme. Bazuar në regjistrat zyrtarë është zbuluar se ndaj Qelajt, ku institucion ka ngritur shtatë aktakuza, për vepra që përfshijnë nga armët ilegale deri te detyrimi e droga. Në vitin 2014, është ngritur aktakuza ndaj tij për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”. Po atë vit, Qelaj është ngarkuar edhe me veprat penale “Lëndim i lehtë trupor” dhe “Asgjësimi apo dëmtimi i pasurisë”. E para këtyre rasteve, në 2011, Prokuroria ngriti aktakuzë ndaj tij për ‘Detyrim’ e një vit më herët, në 2010 për veprën penale ‘Lëndim i lehtë trupor’, raporton Klankosova.tv Edhe në 2007-ën, emri i Qelajt përfundoi në krye të një aktakuzë tjetër për ‘Kanosje’. Ndërsa dy aktakuza të tjera që rëndojnë ndaj tij, në vitin 2002 e 2003, lidhen me veprën ‘Armëmbajtje pa leje’. Për epilogun e të gjitha aktakuzave të ngritura nga kjo Prokurori, Klankosova.tv ka kërkuar përgjigje nga Gjykata respektive. Ajo që del të jetë fort e çuditshme e madje edhe skandaloze, është se nga Gjykata Themelore në Pejë në përgjigjen për redaksinë, kanë bërë të ditur se nuk figuron ndonjë lëndë e mëhershme penale ndaj Qelajt. “Në përgjigje të kërkesës suaj, ju njoftojmë se, duke u bazuar në të dhënat e regjistruara në Sistemin për Menaxhimin e Integruar të Lëndëve (SMIL) të Gjykatës Themelore në Pejë, nuk figuron ndonjë lëndë e mëhershme penale ndaj personit me inicialet A.Q.”/Klankosova.tv Shënim: Personi/personat e përmendur në këtë artikull, prezumohen të pafajshëm deri në një vendim të formës së prerë nga gjykata. https://klankosova.tv/shpallen-ne-kerkim-tre-te-dyshuarit-per-plagosjen-ne-peje/