“Drejtësi, jo relativizim”, protestë para Kuvendit - veteranët të ashpër me qeverinë pas ekspozitës për masakrat

Ka nisur protesta e OVL UÇK-së para Kuvendit të Kosovës, pas ekspozitës së pasaktë për masakrat e cila tashmë është larguar nga hapësira e sheshit të Prishtinës. Në fjalën e tyre, veteranët kanë përmendur se kryeministri Albin Kurti, ndonëse mbante simbolin dhe flamurin kombëtar, kishte në kabinet një këshilltar që sipas tyre “fyente dhe përpiqej të degradonte luftën e UÇK-së”, transmeton Klankosova.tv. Ata kanë përmendur gjithashtu ministra të tjerë që i cilësojnë “anti-UÇK”, duke përfshirë Hekuran Muratin dhe Donika Gërvallën, të cilët sipas veteranëve kanë bashkëpunuar në mënyrë tinëzare për të dëmtuar të drejtat dhe imazhin e veteranëve të luftës. Para mediave, veterani Xhavit Jashari tha: “Dimal Basha ka bërë punime shkencore për ta dëmtuar dhe për të shkelur mbi gjakun e dëshmorëve dhe për t’i dhënë konotacion tjetër luftës sonë. Degradimi i mëtutjeshëm është se brenda kësaj Ministrie, kemi ministren Gërvalla e cila publikisht ka deklaruar se bashkëpunon dhe ka bashkëpunuar me shpifje dhe intriga që të dënohen krerët e UÇK-së të cilët po mbahen padrejtësisht në Hagë e cila në mënyrë tinëzare ka bashkëpunuar me Listën Serbe dhe me kriminelin Milan Radoiçiq për t’i goditur veteranët”.