Drenas, digjet Fabrika e Plastikës, dëmi mbi 10 milionë euro (VIDEO)

Zjarri dhe tym i madh e mbuloi për orë të tëra objektin e Fabrikës së Plastikës në Parkun e Biznesit në Korroticë të Epërme të Drenasit e cila u përfshi nga flakët paraditen e sotme. Kjo bëri që këtu të dalin një numër i madh i zjarrfikësve të kësaj komune, por në ndihmë iu erdhën edhe kolegët nga qytetet përreth. Në vend ngjarje doli edhe ekipi mobilizues i Komunës së Drenasit dhe KFOR-i me kërkesë të kryetarit Ramiz Lladrovci. Por, ky i fundit ka edhe një hall. Ai thotë se Parku i Biznesit gjatë ditës nuk ka pasë furnizim me ujë. "Ujë nuk ka, është ndalë që disa herë, nuk i dijmë arsyet. Sipas informacioneve të mia, ujin në Park të Bizneseve e marrim nga Dobreva", tha Lladrovci. https://www.youtube.com/watch?v=gaRunF6uLss Por, për këtë Kompania Rajonale e Ujësjellësit "Prishtina" ka një sqarim. "Pasi kemi një orar, si shkak i mungesës së ujit në stacionin e pompave në Vragoli, sot është startuar nga ora 11:00 dhe ende jemi duke punuar deri sa të ketë ujë. Besoj deri në ora 18:00, pastaj krijojmë  prapë rezerva për më vonë. Pretendime mundet çdo kush me pasë, neve si KRUP na vjen keq për zjarrin dhe dëmet e shkaktuara!", tha Arjeta Mjeku, zëdhënëse për media në KRUP. Zjarrin, që besohet se shkaktoi dëme materiale deri në 10 milionë euro, ende nuk dihet se ccka e shkaktoi. Për këtë çështje Policia e Kosovës është duke punuar akoma. Klankosova.tv ka provuar të kontaktojë edhe me pronarin e fabrikës në fjalë, por i njëjti pos që konfirmoi se nuk ka të lënduar nga ky zjarr nuk deshi të prononcohet më shumë.