Dronët turq në Kosovë “shastisin” Serbinë, gjenerali serb telefonon “urgjentisht” komandantin e KFOR-it

Gjatë ditës së sotme, në Kosovë mbërritën kontejnerë me mijëra dronë kamikazë prodhim turk, “Skydagger”. Kështu së paku u njoftua nga qeveria në detyrë e Kosovës. Por, kjo gjë nuk i pëlqeu fare Serbisë, ku presidenti i saj, Alleksandar Vuçiq, kritikoi Turqinë për këtë veprim. “Jam i tmerruar nga sjellja e Turqisë dhe shkelja brutale e Kartës së OKB-së dhe Rezolutës 1244 të Këshillit të Sigurimit të OKB-së, si dhe nga armatosja e vazhdueshme e autoriteteve të Prishtinës”, tha Vuçiq në një postim në rrjetet sociale të mërkurën. Ai tha më tej me këtë po bëhet e qartë se “Turqia po dëshiron të rikthejë Perandorinë Osmane” në rajonin e Ballkanit Perëndimor dhe se e njëjta “nuk dëshiron stabilitet” në këtë rajon. Këtë deklaratë të Vuçiqit e kundërshtoi ashpër presidentja Vjosa Osmani, e cila tha se “Vuçiqi mendon se mund ta kërcënojë Turqinë sikurse bën me fqinjët e vet”. E në ndërkohë, nga Ministria e Mbrojtjes e Serbisë erdhi njoftimi ku u tha se Gjenerali Millan Mojsilloviq, Shefi i Shtabit të Forcave të Armatosura Serbe (FAF), zhvilloi një telefonatë “urgjente” me Komandantin e KFOR-it, Gjeneral Major Ozkan Ulutash, për të diskutuar armatimin e vazhdueshëm të Kosovës, përfshirë edhe dorëzimin e fundit të dronëve turq “Skydagger RTF 15”. Gjatë bisedës, siç raportojnë mediat në Serbi, Mojsilloviq “protestoi fuqishëm kundër armatimit të vazhdueshëm të Kosovës, duke e përshkruar atë si një shkelje flagrante të Rezolutës 1244”. Mojsilloviq citohet të ketë thënë po ashtu se “veprime të tilla dërgojnë një sinjal të rrezikshëm, duke kërcënuar jo vetëm sigurinë e Kosovës”... “por edhe atë të të gjithë Ballkanit Perëndimor”. /Klankosova.tv