DW: Kthehet energjia elektrike në Berlin pas sulmit me zjarrvënie

Disa ditë pas atentatit në një urë kabllore në Berlin, energjia elektrike është rikthyer në jugperëndim të qytetit. Sipas operatorit të rrjetit, rikthimi i energjisë nisi gradualisht vonë në mëngjes.  Prej orës 14 u rikthye sot plotësisht. Ndërkohë, po diskutohen pasojat e sulmit. Rryma elektrike ka rifilluar të rrjedhë në jugperëndim të Berlinit, pasi një sulm i dyshuar paralizoi plotësisht furnizimin në zonë për disa ditë. Në mëngjes, kryebashkiaku i Berlinit, Kai Wegner (CDU) kishte njoftuar se furnizimi me energji, i ndërprerë nga një sulm, do të rikthehej gradualisht gjatë ditës. Fillimisht, kjo ishte planifikuar për nesër. Megjithatë, sipas kompanisë shtetërore të energjisë, lidhja e përkohshme vendimtare përmes kanalit Treptow u rikthye dhe u testua me sukses gjatë natës. Puna raportohet se u komplikua nga temperaturat e ulëta dhe materialet e ndryshme të dy kabllove. Ndërprerja më e gjatë e energjisë në Berlin nga Lufta e Dytë Botërore Pas zjarrit në urën e kabllove në rrethin Steglitz-Zehlendorf, 45.000 familje dhe 2.200 biznese mbetën pa energji elektrike të shtunën në mëngjes. Këtë mëngjes, ende rreth 20.000 banesa ishin pa energji elektrike. Sipas të dhënave, kjo është ndërprerja më e gjatë e energjisë në kryeqytet që nga fundi i Luftës së Dytë Botërore. Në një letër, një grup i ekstremit të majtë pranoi përgjegjësinë për sulmin. Mendohet se ata kanë kryer sulme të përsëritura me zjarrvënie ndaj infrastrukturës publike, veçanërisht në Berlin dhe Brandenburg, që nga viti 2011. Zyra Federale e Prokurorit Publik në Karlsruhe ka marrë përsipër hetimet. Ende nuk ka rezultate, por policia ka raportuar se po kryhet një punë e gjerë në vendin e ngjarjes. Politikanët flasin për “terrorizëm të majtë” pas sulmit në Berlin Departamenti i Brendshëm i Berlinit të dielën e përshkroi letrën e marrjes së përgjegjësisë si autentike. Senatori i Brendshëm Spranger (SPD) foli, ashtu siç kishte bërë më parë edhe Kryebashkiaku Wegner, për “terrorizëm të majtë”. Dorasit kishin pranuar me vetëdije dhe qëllimisht që të dëmtoheshin njerëzot. Sekretari i Përgjithshëm i CDU-së, Carsten Linnemann, deklaroi në televizionet RTL dhe ntv: “Ky është terrorizëm. Ky është ekstremizëm i majtë”. Presidenti i Kryqit të Kuq Gjerman kërkon më shumë investime në mbrojtjen civile Si përgjigje ndaj ndërprerjes së gjatë të energjisë elektrike në Berlin, presidenti i Kryqit të Kuq Gjerman, Hermann Grohe, bëri thirrje për më shumë investime në mbrojtjen civile nga qeveria federale. Në të gjithë Gjermaninë, do të nevojiteshin të paktën dhjetë module të ndihmës së lëvizshme për t'u kujdesur për 5.000 njerëz në situata krize të zgjatura, i tha ai Rrjetit Redaktorial Gjerman. Ish-ministri federal i Shëndetësisë theksoi se ndërprerja e energjisë në pjesë të Berlinit thekson edhe një herë sa e cenueshme është infrastruktura kritike. Fokusi vetëm te ushtria nuk mjafton. Shoqata Gjermane e Spitaleve gjithashtu bëri thirrje për më shumë investime në mbrojtjen e infrastrukturës kritike. Edhe pse spitalet zakonisht janë të pajisura me gjeneratorë emergjence, këta garantojnë vetëm funksionim bazë për një kohë të kufizuar, i tha kryetari i bordit të drejtorëve, Gas (Gaß), gazetës Augsburger Allgemeine. Situata gjeopolitike dhe sulmet në Berlin e bënë të qartë pa asnjë dyshim se qëndrueshmëria dhe siguria duhet të jenë pjesë integrale e strukturave të spitaleve në mënyrë të përhershme. /DW