Dyshohet për përdorim të parave të falsifikuara në Ferizaj, arrestohen dy shtetas të huaj

Një rast i dyshuar i përdorimit të kartëmonedhës së falsifikuar është raportuar më 6 shkurt 2026, rreth orës 19:30, në fshatin Prelez i Jerlive në Ferizaj, në një pompë të derivateve. Sipas Policisë, patrulla policore ka identifikuar tre persona të dyshuar: Sh. V. 27 vjeçar, shtetas i Kosovës, si dhe dy shtetas palestinezë, N. Z. 30 vjeç dhe M. O. 28 vjeç. Gjatë kontrollit, Policia ka sekuestruar një kartëmonedhë prej 20 eurosh të dyshuar si e falsifikuar, një sasi të vogël substance narkotike dhe dy mulli, transmeton Klankosova.tv. “Me urdhër të prokurorit të shtetit, janë iniciuar rastet “Falsifikim i parasë” dhe “Posedim i paautorizuar i narkotikëve”. Dy shtetasit e huaj janë ndaluar për 48 orë, ndërsa Sh. V. është liruar pas intervistimit”, thuhet në komunikatë. Më 7 shkurt 2026, gjatë vazhdimit të hetimeve, policia ka identifikuar banesën me qira të të dyshuarve në Ferizaj, ku janë gjetur dhe sekuestruar dokumente identifikimi të shteteve të tjera. Po ashtu, është konstatuar se njëri nga të dyshuarit, M. O., ishte në kërkim ndërkombëtar. Gjatë veprimeve hetimore është identifikuar edhe një e mitur kosovare, A. T. (17 vjeçe), e cila shoqëronte të dyshuarin. Në banesën e saj në Kaçanik janë gjetur 39 kartëmonedha prej 50 dollarësh amerikanë të dyshuara si të falsifikuara, një sasi e vogël e narkotikëve si dhe dokumente të huaja. Substanca narkotike dyshohet se i përkiste E. D. (19 vjeçe). “Të gjitha veprimet janë kryer në koordinim me Njësitin e Hetimeve të Kufirit dhe Prokurorinë Themelore në Ferizaj. E mitura është intervistuar në prani të prindit dhe avokatit, ndërsa ajo dhe E. D. janë liruar për procedura të mëtejme. Hetimet janë duke vazhduar deri në kompletimin e rastit”, thuhet në komunikatë./Klankosova.tv