E pohojnë shkencëtarët, “motra e Omicronit” variant më infektues

Nën-varianti BA.2 i Omicron është më infektues se lloji aktual mbizotërues në shumë shtete, kanë pohuar shkencëtarët. Lloji tashmë është bërë dominues në Danimarkë dhe autoriteti më i lartë i sëmundjes infektive në vend, Statens Serum Institut (SSI), tha se llogaritjet paraprake sugjerojnë se BA.2 mund të jetë 1.5 herë më infektiv se paraardhësi i tij Omicron. Megjithatë, një analizë fillestare nga instituti nuk tregoi asnjë ndryshim në rrezikun e shtrimit në spital. "Ka disa indikacione se është më ngjitëse, veçanërisht për të pavaksinuarit, por që mund të infektojë edhe njerëzit që janë vaksinuar në një masë më të madhe," tha në një konferencë drejtori teknik i SSI-së, Tyra Grove Krause. Profesori Paul Hunter, një epidemiolog në Universitetin e Anglisë Lindore, tha për MailOnline se nuk kishte asnjë arsye për panik rreth BA.2. Ai tha se nuk po shkaktonte një "ndryshim thelbësor në vlerësimet tona aktuale të kërcënimit", transmeton Klankosova.tv. Analiza e gjurmimit të kontakteve sugjeron se transmetimi ndërmjet 27 dhjetorit dhe 11 janarit ka të ngjarë të jetë më i lartë midis kontakteve të rasteve BA.2 në 13.4 për qind, sesa ato për kontaktet e rasteve të tjera të Omicron (10.3 për qind). Por agjencia paralajmëroi se gjetjet duhet të interpretohen me kujdes pasi gjetjet e hershme mund të ndryshojnë shpejt kur identifikohen variante të reja. Një vlerësim paraprak nuk gjeti prova që vaksinat do të ishin më pak efektive kundër sëmundjes simptomatike për BA.2.