E rëndë në Valbonë, turisti holandez bie nga shkëmbi dhe humb jetën

Një ngjarje e rëndë është shënuar sot në zemër të Alpeve Shqiptare, në zonën malore të Valbonës, ku një turist nga Hollanda ka humbur jetën si pasojë e rrëshqitjes nga një lartësi e konsiderueshme e një shkëmbi duke rënë në humnerë, gjatë një ecjeje individuale në një nga majat e thepisura. Presidenti i Federatës Shqiptare të Alpinizmit dhe Turizmit Malor, Artur Guni, konfirmoi ngjarjen dhe dha një reagim zyrtar mbi situatën, transmeton klankosova.tv. ''Është një ditë e trishtë për të gjithë komunitetin tonë. Humbja e jetës së një turisti të huaj në Valbonë është një tragjedi që na prek thellë. Pavarësisht përpjekjeve të menjëhershme të ekipeve të shpëtimit nga Shqipëria dhe Kosova, nuk arritëm ta shpëtojmë jetën e tij dhe në orët e vona të kësaj të marte po punohet në kushte tejet të vështira nga toka dhe ajri për nxjerrjen e trupit të pajetë nga humnera Apelojmë me forcë për më shumë kujdes nga të gjithë vizitorët që eksplorojnë zonat malore. Terrenet tona alpine janë mahnitëse, por edhe kërkojnë përgatitje, informacion dhe masa të larta sigurie'', tha ai. Menjëherë pas sinjalizimit për incidentin, sipas a2cnn, në vendngjarje janë angazhuar strukturat e Urgjencës Kombëtare Shqiptare, forcat ajrore të ushtrisë, si dhe ekipet e specializuara të shpëtimit malor nga të dy anët e kufirit, të cilat kanë bashkëpunuar ngushtësisht në terren për të kryer kërkimin dhe ndërhyrjen. Sipas informacioneve paraprake, viktima ishte duke eksploruar në mënyrë individuale kur dyshohet se ka rrëshqitur dhe ka rënë në një zonë shumë të vështirë për t’u aksesuar. Federata Shqiptare e Alpinizmit dhe Turizmit Malor i shpreh ngushëllimet më të thella familjes së viktimës dhe rikujton rëndësinë e respektimit të protokolleve të sigurisë për të shmangur ngjarje të tilla në të ardhmen. Hetimet mbi rrethanat e plota të ngjarjes janë në vijim.