E tmerrshme: Në Indi përdhunohet një foshnje tetëmuajshe

Një foshnje tetëmuajshe dyshohet se është përdhunuar nga kushëriri i saj në kryeqytetin indian, Delhi, transmeton Klan Kosova. Vajza raportohet të jetë në gjendje të rëndë në një spital lokal, ku është dërguar të dielën. Policia u tha mediave se ka arrestuar të dyshuarin 28 vjeçar. Shefja e Komisionit për Gra në Delhi, Swati Maliwal, e cila e ka vizituar foshnjën në spital, i ka përshkruar plagët e saj si "të tmerrshme". Incidenti ka ndodhur të dielën, por është zbuluar të hënën pas raportimeve të mediave. Statistikat e Qeverisë së Indisë tregojnë se krimet e tilla kundër fëmijëve janë në rritje. Sipas të dhënave të Byrosë Kombëtare të Krimeve, në vitin 2016 janë regjistruar 19,765 raste të përdhunimit të fëmijëve në Indi - rritje prej 82% nga viti 2015 kur janë regjistruar 10,854 raste.