Egjipti ekspozon një gamë të objekteve të lashta të sapo zbuluara

Egjipti shfaqi të hënën një grumbull artefaktesh të lashta që datojnë dymijë e 500 vjet më parë, për të cilat autoritetet e antikitetit të vendit thanë se ishin zbuluar së fundmi në nekropolin e famshëm të Saqqara, pranë Kajros. Artefaktet u ekspozuan në një ekspozitë të improvizuar në këmbët e Piramidës së Hapit të Djoser në Saqqara, 24 kilometra në jugperëndim të kryeqytetit egjiptian. Sipas Mostafa Waziri, kreu i Këshillit të Lartë të Antikiteteve, gjetja përfshin 250 sarkofagë të pikturuar me mumie të ruajtura mirë brenda, si dhe 150 statuja bronzi të hyjnive të lashta dhe enë bronzi të përdorura në ritualet e Isis, perëndeshës së pjellorisë në mitologjinë e lashtë egjiptiane, e gjitha nga periudha e vonë, rreth 500 p.e.s. Një statujë bronzi pa kokë e Imhotep, arkitektit kryesor të faraonit Djoser, që sundoi Egjiptin e lashtë midis 2630 p.e.s. deri më 2611 p.e.s., u shfaq gjithashtu. Artefaktet do të transferohen për një ekspozitë të përhershme në muzeun e ri të madh egjiptian, një projekt ende në ndërtim pranë Piramidave të famshme të Gizës, pak jashtë Kajros. Vendi Saqqara është pjesë e një nekropoli të gjerë në kryeqytetin e lashtë të Egjiptit, Memphis, që përfshin Piramidat e Gizës dhe piramidat më të vogla në Abu Sir, Dahshur dhe Abu Ruwaysh. Rrënojat e Memfisit u përcaktuan si një vend i Trashëgimisë Botërore të UNESCO-s në vitet 1970. Egjipti ka promovuar shumë gjetjet e fundit arkeologjike, duke shpresuar të tërheqë më shumë turistë në vend.