E reja Zana Gjevukaj vdiq pas 34 ditësh qëndrimi në Klinikën Intensive në QKUK, pasi tashmë e ndjera ishte goditur me veturë në Qyshk të Pejës nga një shofer që rezultoi të ishte zyrtar policor.
I dyshuari Argjend Kastrati ndodhet në arrest shtëpiak që nga 1 prilli, dita kur edhe e shkaktoi aksidentin që rezultoi me fatalitet.
Klankosova.tv ka siguruar pamjet nga ky aksident i rëndë.
Në pamje, Zana Gjevukaj shihet teksa e kalon rrugën në pjesën e shënjuar me vija të bardha, që është vendkalim për këmbësorë.
Ajo e kalon njërën pjesë të rrugës, teksa ndalon për të pritur kalimin e veturave që të kalojë edhe pjesën tjetër të rrugës.
Pamjet tregojnë se si një veturë ndalon në korsinë e djathtë, si duket për t’i dhënë përparësi kalimi këmbësores, e cila edhe niset ta kalojë rrugën.
Por një veturë tjetër vjen në korsinë e majtë me shpejtësi të madhe, e cila edhe e godet të renë, duke e hedhur në ajër e duke e rrokullisur disa herë, e cila më pas bie për toke.
Familja e Zana Gjevukajt ka dalë me një reagim, ku ka shprehur zhgënjimin e saj me organet e rendit për mënyrën se si po e trajtojnë këtë rast.
Ata thonë se është zhgënjyese se si i dyshuari në këtë rast, zyrtari policor Argjend Kastrati, vazhdon të qëndrojë në arrest shtëpiak, e jo në paraburgim.
Po ashtu, familja tha se ekspertiza ka vërtetuar se vetura nuk ka frenuar fare në momentin kur e ka goditur Zanën. /Klankosova.tv
●●●
ASHKRIMI NGA
A
Editorial nga Klan Kosova — ndjek lajme dhe zhvillimet e tjera kryesore të vendit.
