Eskalimi i Sinanit, politikani nga Presheva: Erdhi pas një debati që kaloi në nivel personal (VIDEO)

Politikani nga Alternativa për Ndryshim, Almir Shaqiri, ka komentuar ngjarjen në të cilën kryetarja e Preshevës, Ardita Sinani, u pa në një video duke reaguar me tone të ashpra ndaj një zyrtari komunal. Në një prononcim në emisionin “Ora 7” në Klan Kosova, Shaqiri tha se seanca e Kuvendit Komunal ishte planifikuar të mbahej të hënën dhe është zhvilluar në orarin e saj të rregullt, por gjatë diskutimeve ka ndodhur një incident i papërshtatshëm, transmeton Klankosova.tv. Ai shtoi se përplasja nisi gjatë debatit për disa pika të rendit të ditës mes Sinanit dhe këshilltarit të Alternativës për Ndryshim, Amir Latifi, por më pas u shndërrua në një debat personal. "Seanca ka qenë e planifikuar të mbahet të hënën, dhe realisht është mbajtur në orarin e saj të rregullt. Gjatë diskutimit të pikave të rendit të ditës nga opozita, në një moment kryetarja e komunës dhe këshilltarja e kryeministrit,  sepse zyrtarisht nuk e dimë a është apo jo ende, pasi ajo vetë e quan veten si e tillë, ka pasur një reagim jo të zakonshëm. Dhe nuk është hera e parë, sepse edhe në të kaluarën përmes statuseve të saj në Facebook i ka quajtur qytetarët ‘kafshë’, për shkak të festimit të tyre pas fitores së Alternativës për Ndryshim. Kësaj here ka ndodhur një reagim që realisht i ka shqetësuar të gjithë qytetarët e Preshevës, e më pas edhe të Luginës. "Ka ardhur deri te ky moment pas një debati që ajo ka pasur me Amir Latifin, këshilltarin në Asamblenë Komunale nga radhët e partisë sonë, për disa pika të rendit të ditës, e që më pas është shndërruar në një nivel personal",  tha Shaqiri, transmeton Klankosova.tv. Klankosova.tv ka raportuar rreth reagimit të të parës së Preshevës edhe gjatë së enjtes. https://klankosova.tv/hup-aty-mos-mu-ofro-i-pamoralshem-kryetarja-e-presheves-shperthen-ndaj-zyrtarit-komunal-video/ https://youtu.be/YyA97p3FenQ