Sallat operative, hapësirat e kujdesit intensiv dhe një pjesë e stafit të Klinikës së Kardiokirurgjisë në QKUK, nga kjo e hënë deri të premten, janë vënë në dispozicion për 10 fëmijë me probleme dhe anomali në zemër.
Deri të enjten janë operuar tetë raste të tilla, derisa këto intervenime po bëhen nga mjekët italianë dhe amerikanë në kuadër të misionit "Gift of Life".
Moshat e pacientëve të vegjël janë nga disa muajsh deri në 6-7 vjet, ku disa nga ta janë me vrimë në zemër dhe të tjerët me probleme më komplekse.
Drejtuesi i Kardiokirurgjisë, Rifat Brahimaj, tha se po kryhen raste relativisht komplekse të cilat kanë shkuar mirë deri më tani.
Mjekët e huaj, ndonëse hasën në komplikime të lehta gjatë operacioneve, të gjitha në fund rezultuan me sukses - anise kushtet nuk janë optimale.
"Nganjëherë është shumë e vështirë për të bërë gjëra për këta fëmijë, sepse mundësitë nuk janë këtu, janë të pakta. Dhe ndoshta gjendja të cilën e ka një fëmijë ne mund të bëjmë diçka për të duke improvizuar dhe duke qenë më kreativ", tha Gabe Owens, pediatër-kardiolog.
Mirëpo e gjithë kjo nuk do të mund të realizohej pa donatorët, ku këtë radhë shpenzimet i ka mbuluar familja Bajraktari që jeton në Amerikë.
Përfaqësuesja e kësaj familje, Mirlindë Bajraktari, ka ardhur për të parë nga afër të gjithë procesin dhe shprehet tejet e lumtur që kanë arritur t'i ndihmojnë dhjetë familje duke bërë ndryshime të mëdha në jetët e tyre.
Padyshim se prindërit janë tejet falënderues për këtë mision humanitar-mjekësor, ngase këto intervenime jashtë Kosovës janë bukur të kushtueshme.
E drejtuesi i Kardiokirurgjisë tha se është çështje muajsh kur mjekët do të dërgohen në edukim për kardiokirurgji pediatrike në mënyrë që ky shërbim të nisë edhe në Kosovë.
https://www.youtube.com/watch?v=qejgDAaU9Xk&t=2s
●●●
LHSHKRIMI NGA
L H
Editorial nga Klan Kosova — ndjek video lajme dhe zhvillimet e tjera kryesore të vendit.
