Byroja Federale e Hetimeve (FBI) ka ndërprerë zyrtarisht bashkëpunimin me Anti-Defamation League (ADL), një organizatë e njohur që monitoron antisemitizmin dhe ekstremizmin, pas kritikave të forta nga figura të njohura konservatore në ShBA.
Lajmi u bë publik nga drejtori i FBI-së, Kash Patel, të mërkurën, vetëm pak kohë pasi organizata ADL kishte përfshirë aktivistin e djathtë Charlie Kirk në një listë të termave që lidhen me ekstremizmin dhe gjuhën e urrejtjes, shkruan Aljazeera, transmeton Klankosova.tv.
Patel akuzoi ADL-në se kishte vendosur njerëz të saj brenda FBI-së dhe se kishte zhvilluar, sipas tij, “operacione të turpshme për të spiunuar amerikanët konservatorë”.
Megjithatë, drejtori Patel nuk dha prova konkrete për këto pretendime. Ai e lidhi veçanërisht organizatën me ish-drejtorin e FBI-së, James Comey, një kritik i ashpër i Donald Trump, i cili aktualisht po përballet me akuza për pengim të drejtësisë dhe mashtrim ndaj Kongresit amerikan.
Comey, në një fjalim të vitit 2014, kishte lavdëruar ADL-në për bashkëpunimin me FBI-në në fushën e trajnimimit për krimet e urrejtjes, duke e quajtur atë një partner të çmuar.
Pak para njoftimit të FBI-së, ADL fshiu mbi 1,000 terma dhe emra të lidhur me ekstremizmin nga faqja e saj zyrtare, përfshirë edhe përshkrimin për Charlie Kirk dhe organizatën e tij të rinisë konservatore Turning Point USA.
Në versionin e mëparshëm, ADL kishte akuzuar Kirk për përhapje të teorive konspirative mbi zgjedhjet dhe COVID-19, si dhe për qëndrime përjashtuese ndaj komunitetit transgjinor dhe pakicave.
●●●
AHSHKRIMI NGA
Albina Haxholli
Editorial nga Klan Kosova — ndjek lajme dhe zhvillimet e tjera kryesore të vendit.
