Ferizaj: Kacafytja mes qenve eskalon në përplasje mes pronarëve, përdoren edhe armët

Një incident i pazakontë është raportuar në fshatin Prelez i Jerlive të Ferizajt, ku një konflikt mes qenëve ka kaluar në përplasje mes pronarëve dhe të shtëna me armë. Sipas raportit 24-orësh të Policisë, rasti ka ndodhur të mërkurën rreth orës 10:00, transmeton Klankosova.tv. Viktima, ka njoftuar policinë se dy qentë që dyshohet se u përkasin dy personave të tjerë, kanë sulmuar qenin e tij. Gjatë tentimit për t’i ndarë, viktima është kafshuar në disa pjesë të trupit dhe ka marrë trajtim mjekësor. Gjatë incidentit, njëri nga të dyshuarit ka shtënë me armë gjahu në ajër, me qëllim, sipas tij, të zmbrapsjes së qenëve por njëkohësisht dyshohet se ka kanosur edhe viktimën. Njësitë policore, të cilat kanë dalë në vendin e ngjarjes, kanë gjetur dhe konfiskuar një gëzhojë të armës së gjuetisë. Më pas, gjatë bastisjes në shtëpitë e të dyshuarve, policia ka konfiskuar një pushkë gjuetie me leje dhe nëntë fishekë të tjerë. Në konsultim me prokurorin të dyshuarit pas intervistimit janë liruar në procedurë të rregullt.