Fijen: Manifesta, bienalja që do t’i rigjallërojë objektet e harruara të kryeqytetit

Nga 22 korriku deri më 30 tetor, Prishtina pritet të shndërrohet në një qendër të artit dhe të kulturës, kjo pasi këtë vit kryeqyteti do të jetë nikoqir i Bienales Nomade “Manifesta”. Kjo bienale, që për herë të parë mbahet në një shtet të Ballkanit Perëndimor, përbëhet nga një varg aktivitetesh, duke përfshirë ekspozita të artit, diskutime, publikime si dhe intervenime në disa hapësira publike. Drejtoresha e Manifestas, Hedwig Fijen, në “Rubikon”, deklaroi se dinamika e historisë, popullsia më e re në Evropë dhe skena artistike aktive në vend janë disa nga arsyet pse Prishtina u përzgjodh nikoqire e Manifestas në një garë me Vjenën, Bratislavën e Kievin, njofton Klankosova.tv. “Epo ndoshta ishte pikërisht fakti që Manifesta nuk kishte qenë asnjëherë në Ballkanin Perëndimor, fakti që Kosova është vendi më i ri sovran në Evropë, fakti që Ballkani Perëndimor ka një dinamikë shumë specifike dhe interesante të historisë edhe për vetë Evropën, por edhe fakti që e ka popullsinë më të re të Evropës dhe ka një lloj skene artistike shumë aktive”. “Komuna na kërkoi të veprojmë në tri nivele, e para, donin të hulumtonin se si e ardhmja e qytetit mund të ndryshohej në nivel të urbanizmit dhe ndoshta Manifesta do të mund të vepronte si një lloj inkubatori, e dyta, a mund të ofrohet ndihmë në rikthimin e hapësirave publike, sepse ka shumë hapësira publike nga ish-periudha e komunizmit, të cilat ndonjëherë nuk janë mirëmbajtur dhe si t’i kthejmë këto hapësira në të gjelbra, ekologjike, të cilat qytetarët mund t’i shfrytëzojnë bashkë. Dhe pjesa e tretë, si mund të veprojë Manifesta si aktivizues dhe partner vitalizues në transformimin e një nga hapësirave më të bukura ose më të rëndësishme të periudhës post-industriale, që është Fabrika e Tullave dhe si mund të shndërrohet kjo me ndihmën e Manifestas në një hapësirë kulturore”, tha Fijen për "Rubikon". Fijen tha se krahas intervenimeve artistike në ish-Fabrikën e Tullave, Manifesta do të punojë edhe në ndërtesa tjera të harruara të kryeqytetit, disa nga të cilat kanë qenë të mbyllura për publikun për një kohë të gjatë. “Do të punojmë në Hotelin Grand, që është ndërtesë ikonike, shumë simbolike, ndoshta shumë njerëz nuk e kanë vizituar, ndoshta mund të transformohet në diçka të jashtëzakonshme. Do ta bëjmë një transformim të përhershëm të bibliotekës 'Hivzi Sylejmani' në një hapësirë për komunitetin, qendër për komunitetin, kjo është shumë e rëndësishme. Dhe ndoshta një shembull, por do të ketë shumë shembuj, Kino Rinia, një hapësirë ku do të bëhen intervenime artistike.” “Mendoj se ajo që mund t’u pëlqejë shumë njerëzve është të shkojnë dhe t’i vizitojnë ato hapësira që kanë qenë ndoshta të mbyllura, siç është Hoteli Grand, ku do të zhvillohen 7 kate dhe do të ketë ekspozita, performanca, lexim, biseda, fotografi, pastaj do të ketë më shumë se 100 artistë, një e treta e të cilëve do të jenë artistë nga Kosova, por, gjithashtu arkitektë ndërkombëtarë, filozofë, shkrimtarë, ndoshta muzikantë, që do të vijnë në Prishtinë dhe do të punojnë në hapësirat publike, pra mund të shihni skulptorë, kopshtarë, pastaj do të ketë edhe një instalacion masiv, që do të quhet “Qendra Ekologjike Urbane për Mësim”, në ish-Fabrikën e Tullave, për ta kuptuar si mund të transformohet kjo dhe njerëzit do të ftohen të marrin pjesë, ndoshta në kuptim të teatrit, ushqimit, ndoshta kopshtarisë, pastaj në bibliotekën 'Hivzi Sulejmani' mund të ketë një projekt për edukim, por edhe fëmijët mund ta bëjnë një program të radios, një podcast, ndoshta edhe një video të vogël dhe studio televizive, do të ketë krijim të hapësirave, sepse ne e kuptojmë që ka shumë, le të themi njohuri, këtu për punëdore dhe forma të tjera, ku artistët janë të dalluar, pra do të ketë hapësira ku artistët mund të bëjnë diçka, por mund të ecësh edhe nëpër qytet dhe të shohësh të gjitha llojet e gjerave shumë të këndshme, presim që dy mijë gazetarë nga e tërë bota të vijnë”, tha Fijen.