Fillon sezoni turistik në Durrës

Data 11 prill shënon çeljen zyrtare të sezonit turistik me kroçiera për vitin 2025. “MS Hamburg”, kroçiera e parë për këtë vit, e cila mban në bord 250 turistë – kryesisht gjermanë dhe francezë – është dallëndyshja që ngre siparin e këtij sezoni në Portin e Durrësit. Turizmi me kroçiera ka njohur një rritje progresive nga viti në vit në kryeqendrën portuale të vendit, me një numër gjithnjë e më të lartë anijesh turistike që përfshijnë Durrësin në itineraret e tyre në Adriatik dhe Mesdhe, raporton A2CNN, transmeton Klankosova.tv. Muaji prill është mikpritësi i vizitorëve të parë me kroçiera, ndërkohë që për këtë sezon janë planifikuar për t’u ankoruar në Durrës gjithsej 13 kroçiera, të cilat do të vijojnë vizitat edhe përgjatë muajve të vjeshtës.