Fillon zyrtarisht edicioni i parë i “Ditëve të Historisë” në UP

Sot është hapur zyrtarisht edicioni i parë i “Ditëve të Historisë”, i organizuar nga Departamenti i Historisë në kuadër të Fakultetit Filozofik të Universitetit të Prishtinës. Përmes një njoftimi, bëhet e ditur se kjo ngjarje synon të promovojë vlerat akademike dhe kulturore përmes një sërë aktivitetesh që do të zhvillohen gjatë ditëve në vijim, transmeton Klankosova.tv. Në fjalën hapëse të ceremonisë, shefi i Departamentit të Historisë, Mentor Hasani, shprehu mirënjohjen për të pranishmit dhe njoftoi për themelimin e çmimit vjetor “Rrustem Hyseni”, që do t’u ndahet studentëve bursistë të këtij departamenti. Ky çmim mban emrin e Heroit të Kosovës, Rrustem Hyseni – një ish-student i dalluar i Historisë dhe një figurë e shquar e Lëvizjes Studentore të vitit 1997. Me fjalë rasti u paraqitën edhe Rektori i Universitetit të Prishtinës, Arben Hajrullahu, si dhe Dekani i Fakultetit Filozofik, Bekim Baliqi, të cilët vlerësuan lart organizimin e këtij edicioni dhe rëndësinë e tij për jetën akademike dhe kujtesën historike. Profesor Bujar Dugolli, një nga figurat udhëheqëse të Lëvizjes Studentore të vitit 1997, mbajti një fjalim të veçantë ku ndau një biografi të shkurtër të Rrustem Hysenit, duke theksuar kontributin e tij të jashtëzakonshëm në përpjekjet për dije dhe liri. Ceremonia u përmbyll me ndarjen e mirënjohjeve për studentët bursistë të vitit akademik 2023/2024. Po ashtu, një mirënjohje post-mortem iu nda ish-studentit Arbër Ibrahimi, në shenjë nderimi për përkushtimin e tij akademik. Në emër të tij, mirënjohjen e pranoi nëna e tij, Shemsije Ibrahimi, e cila falënderoi Departamentin për kujdesin dhe respektin e treguar.