Gashi: Divorci për disa fëmijë dhe familje është zgjidhja më e mirë (VIDEO)

Arjeta Gashi nga Asociacioni për Prindërit Beqar, sonte në emisionin “Shoqet” në Klan Kosova ka folur lidhur me sfidat e divorceve. Ajo theksoi se divorci nuk duhet parë gjithmonë si opsioni më i keq. Sipas saj, në shumë raste, ndarja mund të jetë zgjidhja më e drejtë për familjet dhe sidomos për fëmijët, pasi i largon ata nga një ambient i mbushur me tension. “Vazhdimisht po e themi se jo çdoherë divorci është më e keqja. Shpeshherë për shumë fëmijë dhe për shumë familje, divorci është zgjidhja më e mirë dhe më e drejta për t’u larguar nga një tension brenda familjes”, tha ajo. Megjithatë, Gashi nënvizoi se sfidat nuk përfundojnë me ndarjen. Ajo shpjegoi se personat që dalin nga marrëdhënie toksike shpesh përballen me një betejë të re, atë me sistemin. Sipas saj, kjo luftë bëhet edhe më e vështirë kur duhet të përballohet e vetme. “Por, çka ndodh, nga një ambient toksik, ti duhet të dalësh edhe të luftosh pastaj me një sistem. Lirohesh nga një person, por duhet të fillosh luftën me sistem, e luftën ta bësh me sistem e vetme, është shumë vështirë, prandaj edhe shumë shpesh kërkojmë dhe bëjmë thirrje që prindërit t’u qëndrojnë pranë vajzave të tyre”, u shpreh Gashi./Klankosova.tv https://www.youtube.com/watch?v=HmoP-larpgc