Gjatë arrestimit lëndoi një person, IPK rekomandon suspendimin e një zyrtari policor

Inspektorati Policor i Kosovës respektivisht hetuesit e Departamentit të Hetimeve, kanë rekomanduar suspendimin e një zyrtari policor në Ferizaj, nën dyshimin se ka përdorur forcë ndaj një qytetari (shofer) gjatë arrestimit, dhe si pasojë i ka shkaktuar lëndime. Sipas njoftimit të IPK-së, rasti ka ndodhur në orët e para të së premtes, transmeton Klankosova.tv. Njoftimi i plotë i Inspektoratit Policor i Kosovës: Inspektorati Policor i Kosovës respektivisht hetuesit e  Departamentit të Hetimeve kanë pranuar sot një informacion nga Policia e Kosovës për një incident në Ferizaj. Ngjarja ka ndodhur mbrëmë para mesnatës kur disa zyrtarë  policorë edhe pse e kishin sinjalizuar ndaljen e një veture e njëjta nuk ishte ndaluar. Sipas informacioneve të para raportohet se pas disa minutave të përcjelljes nga policia e njëjta veturë është ndaluar dhe se në këtë veturë  ndodheshin tre qytetarë. Hetuesit e IPK-së kanë dale në vendin e ngjarjes dhe kanë filluar të ndërmarrin veprime hetimore lidhur me këtë rast pasi që dyshohet se gjatë arrestimit të personave të dyshuar ka tejkalime të autorizimeve policore gjatë përdorimit të forcës nga një zyrtar policor ndaj njërit të dyshuar (drejtuesit të automjetit) i cili ka pësuar lëndime trupore dhe ka pranuar tretman mjekësor. Hetimet janë duke u zhvilluar në drejtim të veprave penale “Keqtrajtimi gjatë ushtrimit të detyrës zyrtare ose autorizimeve publike” dhe “Lëndimi i lehtë trupor” kurse pas konsultave me prokurorinë rasti  do të trajtohet në procedurë të rregullte. Bazuar në autorizimet ligjore të IPK-së dhe në interes të hetimit IPK ka rekomanduar suspendimin e këtij zyrtari policor. Hetuesit e IPK-së në konsultim të vazhdueshëm me prokurorin përgjegjës pritet të ndërmarrin edhe veprime të tjera hetimore lidhur me këtë rast për të sqaruar rrethanat e këtij incidenti.