Një burrë që e humbi unazën e martesës në oborrin e prindërve të tij në Tenesi të SHBA-së, u ribashkua me të gati 55 vjet më vonë kur u gjet nga pronari i tanishëm i shtëpisë.
Ransom Jones tha se para pesë dekadash ishte duke e përpunuar një dru kur unaza e martesës i ra nga dora.
“Teksa hodha një tufë ashkla në kopsht, unaza shkoi bashkë me to”, tha Jones për Daily News Journal, transmeton Klan Kosova.
Ai shtoi se së bashku me familjen e kërkuan atë për vite me radhë, dhe se shpesh i dërgonin fëmijët e tyre në oborr për ta kërkuar.
“Djali im, i cili tani është 51 vjeç, mendoi se e gjitha ishte mashtrim me qëllimin për t’i mbajtur ata të angazhuar”, tha Jones. “Gjithmonë ka qenë në mendjen time”.
Ndërkaq, pronari i ri i shtëpisë, Cook, u shpreh se këtë unazë e kishte gjetur gjatë kohës së lirë që e kishte në periudhën e pandemisë.
Ai filloi kërkimin e thesarit me anë të një detektori metali. Unaza me inicialet “W.R.J.” dhe data 21 janar 166 u gjet nën rreth 10 centimetra papastërti.
Cook tha se unaza ishte rreth 100 metra larg nga vendi ku Jones kishte menduar se e kishte humbur.
Ai kontaktoi me avokatin që ishte marrë me shitjen e shtëpisë, i cili foli me Jones. I emocionuar, ai e vizitoi shtëpinë po atë pasdite dhe e mori unazën e tij të humbur prej kohësh.
“Ishte ngjarje mjaft e emocionuese dhe një nga përvojat më të lumtura që kam përjetuar”, deklaroi Jones.
●●●
EVSHKRIMI NGA
E V
Editorial nga Klan Kosova — ndjek lifestyle dhe zhvillimet e tjera kryesore të vendit.
