Bundestagu ka votuar për të shfuqizuar një program të posaçëm që u lejonte të huajve të kualifikuar të aplikonin për shtetësi pas vetëm tre vitesh qëndrimi në Gjermani, në vend të pesë vjetëve që kërkohen zakonisht.
Vendimi vjen pasi programi, i prezantuar në vitin 2024 nga ish-kancelari Olaf Scholz, u përdor shumë pak dhe u bë objekt kritikash nga qeveria e re e krahut të djathtë, shkruan Aljazeera, transmeton Klankosova.tv.
Sipas një sondazhi të transmetuesit publik ARD, nga viti 2024 e deri në prill 2025, vetëm 573 persona në Berlin kishin aplikuar për këtë program. Në Bavari ishin 78 aplikime, ndërsa në Baden-Württemberg vetëm 16. Në total, aplikimet përbënin vetëm 1.02% të të gjitha kërkesave për shtetësi.
Ministri i Brendshëm, Alexander Dobrindt, deklaroi se programi e “zbehte vlerën e shtetësisë gjermane”.
“Pasaporta gjermane duhet të jepet si njohje për integrim të suksesshëm, jo si nxitje për migrim të paligjshëm”, tha ai për mediat.
Politikani Ferat Kocak nga partia Die Linke e kritikoi vendimin, duke thënë se qeveria “po e bën gjuhën e urrejtjes të AfD-së të pranueshme për shoqërinë”.
AfD është e njohur për qëndrimet e saj të ashpra kundër emigrantëve dhe ka bërë thirrje më herët për “deportime masive”.
●●●
AHSHKRIMI NGA
Albina Haxholli
Editorial nga Klan Kosova — ndjek lajme dhe zhvillimet e tjera kryesore të vendit.
