Gjokoviq optimist se do të lejohet të luajë në Australian Open

Novak Gjokoviq ka thënë se atij i janë dhënë "shenja pozitive" se ai do të lejohet të hyjë në Australi për të konkurruar në Australian Open në janar, pavarësisht se është nën një ndalim tre-vjeçar të vizave. Gjokoviq tha se këto indikacione ishin mbi baza “jozyrtare”. “Kur bëhet fjalë për Australinë, ka disa shenja pozitive, por jozyrtarisht. Ne po komunikojmë përmes avokatëve të mi në Australi. Në fakt, ata po komunikojnë me organet përgjegjëse për çështjen time. Shpresoj të kem një përgjigje në javët e ardhshme – cilado qoftë ajo përgjigje, por sigurisht që shpresoj për një përgjigje pozitive – në mënyrë që të kem kohë të mjaftueshme për t’u përgatitur për fillimin e sezonit”, tha Gjokoviq. Ai tha se duhet të ketë konfirmim në javët e ardhshme nëse do të lejohet. “Unë me të vërtetë dua të shkoj atje, e kam kaluar atë që ndodhi këtë vit dhe dua vetëm të luaj tenis, kjo është ajo që bëj më së miri. Australia ka qenë gjithmonë vendi ku kam luajtur tenisin tim më të mirë, rezultatet flasin vetë, kështu që jam gjithmonë ekstra i motivuar për të shkuar atje. Këtë herë edhe më shumë. Shpresoj për një përgjigje pozitive”. Gjokoviq ishte numri 1 i botës kur zbarkoi në Melburn duke besuar se i ishte dhënë përjashtimi nga nevoja për t'u vaksinuar kundër COVID-19. Por, viza e tij u anulua nga Forcat Kufitare Australiane dhe ai u mbajt në paraburgim, raporton Guardian, transmeton Klankosova.tv. Pas shumë argumenteve ligjore dhe mbulimit të madh mediatik, Gjokoviq u deportua me një ndalim të vizës tre-vjeçare. Ai më pas humbi edhe US Open pasi nuk iu lejua hyrja në Shtetet e Bashkuara për arsye të njëjtë.